Ик-бичкн уга күндлҗ тевчнә

Яшкулин района әмтнә социальн теткврин комплексн төвин социальн көдләч Аван Кермн төрскн Чилгр селәнд арвн долан җилдән һанцарн бәәдг медәтнрт, гемтә-шалтгта улст дөң күргҗ, үнн-чик седклтәһәр көдлсмн. Эн җил социальн көдләчин сән өдрлә Кермн Деглеевнан ач-тус темдгләд, «Хальмг Таңһчин әмтнә социальн харслтын ачта көдләч» гидг өөдән нерн зүүлһгдсмн. Хамдан көдлҗ йовсн үүрмүднь, нег һазра улс болн өрк-бүлнь байринь хувалцҗ, ачлвр авснлань цаһан седкләсн йөрәв.

Хамгин түрүнд хөрн шаху җилдән Кермн Деглеевнан хәләврт бәәсн медәтнр эднә социальн көдләчин ач-тус темдглҗ ачлснд байрлҗ, энүнд бүлән үгән келснь орта. Эн җилмүдин эргцд социальн көдләч эдниг арднь орҗ хәләһәд, гер-бүүрин олн зүсн төрмүд хаһлҗ, байр-зовлңгинь әдл хувалцҗ, өөрхн элгн-саднла әдл болв. Яшкулин района КЦСОН-а һардач Пүгинә Викториян темдглсәр, сүл һурвн җилин туршарт Аван Кермн энүнә хәләврт бәәсн медәтнрт болн эрмдгтә улст 1776 дәкҗ одв, социальн көдләчин хайгар медәтнрәс ханлтын бичгүд дару-дарунь ирҗ, өр-өвч седклтә, сәәхн заңта, чик авг-бәрцтә, тесвртә күн болдг төләдән күн болһнд нәәһинь олна гиҗ эдн бичнә.
2000 җилмүдин эклцәр Аван Кермн Чилгр селәнә эмнлһнд көдлдг билә. Тер цагт хойр көвүнь оютнр бәәсмн, тегәд бичкн җалвнь әрә күртдмн. Өрк-бүлән теҗәхәр күүкд күн Москва балһснд одад көдлв, болв дарунь хәрҗ ирәд, цаг зуур көдлмш уга билә. Тиигхд Чилгр селәнә ахлачар Хулхачин Сергей көдлҗәлә, тегәд эн күүкд күүнд социальн көдләчәр көдлх үрвр кесмн. Үрн-садн, элгн-садн уга нег медәт селәнд билә, тегәд терүнд дөң-нөкд болад, социальн халхар күч-көлснә хаалһан эклсмн.
- Арвн долан җилдән социальн көдләчәр көдләд, ода ачта амрлһнд һарв. Эн җилмүдин эргцд кесг күн мини хәләврт билә, күн болһна заң, авг-бәрц медәд, килмҗән тусхаҗ көдлхәр шундг биләв. Медәтнрин сурврар геринь ахулад, хот-хол,эм хулдҗ өгәд, туслмҗин мөңгинь өгәд, кергтә болхла эмчиг дуудад дөң болдг биләв. Мана селәнд хойр социальн көдләч бәәнә, Орһан Кларала хамдан бидн нег-негндән нөкд болад, ниитә кевәр көдлвидн. Медәтнриг, эрмдгтә улсиг сән өдрмүдлә йөрәһәд, бичкн белгән белглдг биләвидн. Үлгүрнь, шин җил угтҗ бидн Киитн аавин болн ач күүкнә хувц өмсәд, медәтнриг йөрәҗ байр үүдәҗ оддг бәәснь эднә зүрк хәәлһүлдг бәәсмн, – гиҗ Кермн Деглеевна келнә.
Нүднә харань муурсн Виктор Манджиевич Очиров, медәтнр Зоя Бадмаевна Манджиева, Зоя Есиновна Бузоваева социальн көдләчин хәләврт хөрн шаху җилдән бәәсмн. Һанцарн бәәдг медәтнрт социальн көдләч түрүн нөкд, итклтә үр болҗ, эднлә байр-зовлңгинь хувалцҗ, чееҗин киләсинь медҗ хамгин өөрхн күн болна. Эднә сурсиг кеһәд, ямр нег даалһвринь күцәһәд, баһ цаган тодлад, ю-бис күүндәд эднд цаган хамдан давулдг бәәсмн.
Кермн Деглеевна Сарң Очирович авальтаһан дөчн җилдән ни-негн, сән-сәәхн бәәнә. Герин эзн олн җилдән малын хошт көдлсмн. Хойр көвүнь өлзәтә үрд болҗ өсв, гертә-малта. Ууһн Очр Чилгр селәндән өрк-бүлтәһән бәәнә, Анна Николаевна авальнь бичкдүдин сад һардна. Эдн дөрвн үртә. Отхн Санҗ эцкиннь кергиг делгрүлҗ, бас малд көдлҗәнә, Ирина авальнь таңһчд үүлддг МЧС-ин заллтын көдләч болна. Кермн Деглеевнан келсәр, авальнь болн көвүднь энүнд дөң болҗ, медәтнрт хот-хол авч ирдг, мал услдг, хаша-хаац цеврлдг бәәсмн. Сул цагтан күүкд күн олн зүсн цецгүд, зер-земшин модд урһана. Ээҗ ачнртан әвр эңкр болна, эднә күцәмҗд байрлҗ, хамдан цаган давулхдан таасна. Көвүднь өрк-бүләрн эк-эцкин герт цуглрад, сән өдрмүдин байр темдглхәр ирхлә Кермн Деглеевна сенр хот-хол белдәд, цугтаһинь тоохдан дурта. Ода эн ачта амрлһнд һарв, тегәд өөрхн улстаһан амрхд сул цаг бәәнә.

ДООҖАН Наталья
ЗУРГТ: Хальмг Таңһчин социальн харслтын цергллтин ачта көдләч Аван Кермн болн энүнә хәләврт бәәсн Манҗин Зоя