Эмчнр бичкдүдин әм аврв

Сегодня, 12:30 | Общество, Таңһчин зәңгс, Зіњг, Эрўл-менд харлһн

2023 җиләс авн мана орн-нутгт һарсн нилхдин эрүл-мендин бәәдл шинҗллһнә керг-үүлдвр эклсмн. Терүнә йовудт урднь тавн күнд гем илдкҗ авдг бәәсмн, ода болхла 36 гем эртәр илдкҗ авгдҗана. Мана таңһчд эн җилин эклцәс авн 913 нилхд гүн шинҗллт кегдв.

О.Шунгаеван нертә нилхд төрлһнә төвд эн җилин хаврар гүн шинҗллтин йовудт нег нилхд ховр күнд гем илдкгдсн билә. Таңһчин эмчнр орн-нутгин нүүрлгч төвмүдлә залһлда бәрәд, «Круг добра» гидг саңгин дөңгәр Золгенсма гидг үнтә эм хулдҗ авв. Келхд, эн эм нарт-делкәд хамгин үнтә гисн эмин тоод орна, эн 100 сай арслң күрнә. Терүг нег дәкҗ нилхд өгснә хөөн күнд гемәс эдгҗ болхмн.
Хальмг Таңһчин эрүл-менд харлһна министр Саран Булатын келсәр, нилхд эн гем илдкгдснә хөөн орн-нутгин медицинск төвд немр шинҗллт кегдәд, эн әәмшгтә гем иткүлгдв. Әрәсән Президентин седвәрәр күнд болн ховр гемтә бичкдүдт дөң күргхин төлә «Круг добра» гидг саң бүрдәгдсн билә. Тегәд эн саңгин дөңгәр нилхд үнтә эм хулдҗ авх шиидвр авгдсмн. Буйнч седклин саң үнтә эм хулдҗ авсна хөөн нилхд эмнлһн кегдв. Зуг эн эм туслхин төлә шишлң цаг-болзгин кемд эмнлһиг кех кергтә. Нилх һарсна түрүн өдрмүдт гүн шинҗллт кегдәд, күнд гем илдкгдәд тер дарунь кергтә эмнлһн кегсднә ашт бичкнә әм аврҗ болв. Ода нилх гертән бәәнә, энүнә эрүл-мендд ямаран чигн әәмшг учрҗахш. «Круг добра» гидг саң мана таңһчд 12 күүкн-көвүнд дөң болв, теднәснь 12 бичкн үнтә эмәр, негнь болхла медицинск кегдлмүдәр теткгдҗәнә, – гиҗ Булат Амангельдыевич келв.
Шидр хальмг эмчнр һун наста бичкн көвүнә әм аврсна туск зәңг һарв. Нег өдр П.Жемчуевин нертә таңһчин эмнлһнә гемтә улсиг орулҗ авдг әңгд һар деерән үрән теврҗ күүкд күн орҗ ирв. Үрнь кинь давхцад, уха-сегәһән гееһәд, тас уга болсиг эк келәд, дөң болхиг сурв. Тер цагт көдлмштән бәәсн эмчнр Цеднә Александр болн Улана Ульяна түрүн дөң күргәд, көвүнә әм аврв. Көвүнә экин келсәр, көвүн халу дөрәд гемнҗәлә, генткн шүрүсн татад, эн уха-сегәһән геев. Күүкд күн көвүһән атхад, һазаран гүүҗ һарв, тенд хам-хоша бәәдг залу күн эдниг үзәд, өөр шидр бәәдг таңһчин эмнлһнд эдниг күргв. Бичкдүдин эмнлһнд күрхд цаг бачм билә, тегәд нааран авч ирсмн.
- Көвүн 39 градус халу дөрәд, шүрүсн татв. Мана эмчнр тер дарунь түрүн дөң күрглһнә керг-үүлдврмүд кеһәд, көвүнд дөң күргв. Мана эмчнр Цеднә Александр болн Улана Ульяна, фельдшермүд Эрднь-Һәрән Виктория болн Бельтрикә Җаңһр көвүнд дарунь цуг кергтә эмнлһ кеснә хөөн эн әмдрв. Дарунь түргн дөң күрглһнә цергллтин мергҗлтнр ирәд, көвүг таңһчин бичкдүдин эмнлһнд күргв. Тенд көвүн эмнлһ авад, эрүл-мендән батрулад герүрн хәрв, – гиҗ П.Жемчуевин нертә таңһчин эмнлһнә ах эмч Чумпинә Саглр келв.
Көвүнә эк Лизинә Ноһан үрнәннь әм аврснд эмчнрт ханлтан өргв. «Көвүм уха-сегәһән геехлә бачм дөң күрглһнд цаг зогссн болҗ медгдв. Болв мана эмчнр дарунь дөңгән күргәд, мини көвүнд кергтә эмнлһ кеҗ әминь аврв. Таңһчин эмнлһнд бөдүн улс эмнлһ авдгиг би меднәв, болв тер цагт ухалх цаг бачм билә. Мини көвүнә әм аврсн цуг улст зүркни ханлтан өргҗ, эднә цаһан седкләсн күргсн дөң буйн болтха, цуһар эрүл-менд бәәтхә», – гиҗ көвүнә эк темдглв.
Өдр-бүрин йовудт бидн адһад, мадн дунд иим йовдлмудын тускар ухалхшвидн. Болв мана эмчнр өдр болһн гилтә кесг күүнә әм аврҗ, көдлмшән үнн-чик седклтәһәр кеҗ, күн болһнд килмҗән тусхаҗ йовхиг мартхмн биш.

ДООҖАН Наталья
ЗУРГТ: П.Жемчуевин нертә таңһчин эмнлһнә гемтә улсиг орулҗ авдг әңгин көдләчнр

Видео