Бәәсн һазран делгрүлхәр шунҗана

Яшалтан района Ульяновское селәнд олн келн-улс ни-негн, нег-негнәннь сойл, авъяс күндлҗ ниитә бәәнә. Бәәрн улсин ик зунь месхетин түрг келн-улс болна. Эдн 80-ч җилмүдин чилгчәр болн 90-ч җилмүдин эклцәр нааран нүүҗ ирәд, энд батрад үлдв. Эдн хальмг теегт хөвән олҗ, энд өрк-бүлән өндәлһәд, күүкдтә, ачнр-зеенртә болад, тааста керг делгрүлҗ, олн җилин эргцд энд иҗлдв. Сүл җилмүдт селәнә муниципальн бүрдәцин һардвр болн бәәрн улс бәәсн һазриннь делгрлтин болн сән кец-таал тогталһна халхд аһу ик көдлмш күцәҗ гиҗ темдглх кергтә. Одахн көдлмшин халхар тиигәрән одхларн бидн Ульяновское селәнә муниципальн бүрдәцин толһач Анвар Усмановла күүндвидн.
Келхд, Анвар Латипович селәнә толһач болҗ арвн тавн җилдән үүлдҗәнә. Энүнә чадмг һардврт селәнд шаңһа көтлврмүдин болн келн-улсин төсвсин йовудт кесг керг күцәгдв. Тиигәд, хойр җил хооран бәәрн улсин седвәр дөңнлһнә көтлврт эдн орлцад, дунд сурһуль күртл тротуар кев, нидн болхла бичкдүд нааддг болн спортивн талвңгуд тосхгдв. Селәнә бәәрн улс чик авг-бәрцәр бәәҗ, спортар соньмсна. Тиигәд энд хойр футбольн команд бәәнә, эдн района болн таңһчин бәәтхә, регионмуд хоорндк марһаст орлцҗ нер һарна. Энд өрк-бүл болһн гилтә өнр-өсклң болна, баһ гиснь һурвн-дөрвн үрн бәәнә. Селәнә бичкдүдин садт 180 орм бәәнә, тенд сул орм уга.
- Эндр мана селәнд 2491 күн бәәнә, эннь 455 өрк болна. Селәнд дунд сурһуль, бичкдүдин сад, эмнлһн, сойлын гер, поштын әңг үүлднә. Баһчуд талдан һазрур нүүхш, өрк-бүлән өндәлһәд, күүкдән асрҗ энд торад бәәнә. Бәәрн улс нурһлҗ гер деерән теплиц тосхҗ олн зүсн темс урһаҗ, хам-хоша бәәдг селәдт, балһсдт хулдҗ бийән теҗәнә. Темс урһалһн олзта-орута керг болна. Зәрмснь талдан регионмудын арһлачнрла олн җилин эргцд нөкцҗ үүлдәд, теднд урһцан хулдна. Зәрм бәәрн улс селәнә эдл-ахуд тәрә тәрлһнә, урһц хуралһна халхд көдлнә. Селәнәхн бәәсн һазран цевр-цер бәрҗ, энд сән таал тогталһна седвәр татҗ, шаңһа көтлврт орлцхар шунна. Эн көтлврин йовудт бәәрн арһлачнр демән күргнә, селәнә бүрдәцин болн таңһчин хазнас немр мөңгн йилһгднә. Эн җил бидн селәнд йовһар йовдг хаалһс болн зәрм уульнцст шам углҗ тәвлһнә төсв күцәхәр марһанд орлцсн биләвидн, болв терүнд диилвр бәрсн угавидн. Болв ирх җилд эн төсвиг күцәхвидн гиҗ ицҗәнәвидн. Җил ирвәс мана селәнд сән таал тогтагдҗана, – гиҗ Анвар Латипович келнә.
Нидн «Балһсна сән кец-таал» гидг келн-улсин төсвин йовудт селәнд парк секгдв. Бәәрн улсин келсәр, энд амрлһна өдрмүдт болн асхнднь баһчуд, баахн эк-эцкнр бичкдүдтәһән ирҗ амрхдан дурта. Энд тротуарн плитк углҗ тәвгдв, сууһад амрхин төлә олн зүсн суудл тәвгдв. Давсн җилд «Гер-бүүр болн балһсна кец-таал» гидг келн-улсин төсвин «Цевр усн» гидг орн-нутгин көтлврин йовудт селәнд ус цуглулдг боодг тосхгдв. Терүнд ут тоодан 1 сай 430 миңһн арслң олзлгдв. Эн җил болхла селәнд «Селәдин делгрлт» гидг шаңһа көтлврин медлд уудг усар тетклһнә сурвлҗн тосхгдҗана, эн кергт 68 сай арслң йилһгдв. Энд 1960-ч җилмүдт тосхгдсн сурвлҗн билә, зуг тер хуучрв, тегәд ода терүг шинрүллһнә көдлмш кегдҗәнә. Тосхлтын көдлмш эн җилин чилгчәр төгсх зөвтә. Бәәрн улс сад-һарудт темс болн зер-земш урһана, олн зүсн мал болн шову асрна, тегәд техническ усар теткдг сурвлҗн хадһлгдхмн.
Селәнә муниципальн бүрдәцин толһач Анвар Усмановин темдглсәр, энд бәәдг улс бәәсн һазртан эңкр, төрскнч секдлтә, чик авг-бәрцтә, өвкнриннь сойл, тууҗ, авъяс хадһлҗ дорас өсч йовх баһ үйд чик сурһмҗ өгхәр шундг улс мөн. «Мана селәнә уульцст согту, аля-азд йовдл һарһдг улс харһхш. Селәнд зуг нег лавкд әрк-чаһр хулдна. Удл уга эдн терүг хулддган уурхмн. Бидн чик авг-бәрцтә, эрүл бәәлһнә селән болхар шиидвидн. Мана седвәриг талдан селәдин әмтн бас дөңнхлә сән болхмн билә. Дорас өсч йовх баһчудт үлгүр болад, спортар соньмсҗ, чик авг-бәрцәр бәәх кергтә», – гиҗ Анвар Латипович ухан-тоолврарн хувалцв.
ДООҖАН Наталья
ЗУРГТ: Ульяновское селәнә паркд бәәрн улс амрчах кем