Әрәсән багшнрин түрүн чуулһн болв

Одахн Москвад, Келн-улсин «Әрәсә» төвд, Цугәрәсән багшнрин чуулһн болв. Цуг орн-нутгас 1,2 миңһн багш ирв, тер тоод Хальмг Таңһчин багшнр, сурһулин һардачнр болн таңһчин сурһуль-эрдмин болн номин министр Александр Ким чуулһна көдлмшт орлцв. Тер мет Әрәсән РАН-а, Орн-нутгин Хүүвин депутатнр болн сенатормуд, күцәгч йосна болн олна бүрдәцсин элчнр бас эн чуулһнд орлцсинь темдглхмн.

Олнд соңсхад, Әрәсән Президент Владимир Путинә йөрәл умшгдв. Хүвсхлин өмнк, советин йосна болн өдгә цагин Әрәсән сурһулин авъясиг тоод авхмн, теднә эв-арһиг олзлхмн гиҗ йөрәлд келгдв. Хамгин түрүнд сурһулин көтлвриг шинрүллһнә болн мергҗлттә багшнриг белдлһнә төр күцәх кергтә гиҗ заагдв.
Әрәсән залврин Ахлачин дарук Дмитрий Чернышенко чуулһнд орлцачнриг йөрәҗ үг келв. Багшнрин чуулһн тууҗлгч чинртә болҗана гиҗ һардач заав. XXI зун җилд түрүн болҗ тиим ик керг-үүлдвр кегдҗәнә. Дигтә зун җил хооран 1925 җилд Цугсоюзин багшнрин түрүн чуулһн болсмн.
«Эндр Әрәсән сурһуль-эрдмин халх делкәд нүүрлгч орм эзлҗәнә. Оютнрин болн сурһульчнрин нарт-делкән олимпиадмудт Әрәсән уйн наста элчнр алтн болн нань чигн медальмүдәр ачлгдна. Советин Союзин эрдм-сурһулин болн педагогикин авъясиг хадһлад тиим ашта болв гиҗ Дмитрий Чернышенко темдглв.
«Сурһуль-эрдм» келн-улсин төсвин нилчәр кесг тоот күцәгдв, түүнә улд болн «Баһчуд болн бичкдүд», «Өрк-бүл», «Кадрмуд» шин төсвин улд 2030 җил болн цааранднь 2036 җил күртл көтлврин келн-улсин күслмүдт күрх зөвтәвидн. Сурһуль-эрдмиг 2036 җил күртл делгрүллһнә кев-янз үүдәгдлә, терүг белдлһнд багшнр, номтнр, эк-эцкнр болн эн халхин һардачнр орлцв.
Шин кев-янзин туск күүндвр регионмудар болсмн. Ноха сарин хургт цуг багшнр ирлцңгү төрәр күүндвр кех, цааранднь классин һардачнрин ик хургт ашнь диглгдх гиҗ дааврта һардач темдглв. Чуулһнд багшнр эврә седвәрән медүлҗ чадв.
Тер мет Әрәсән гегән-герлин министр Сергей Кравцов келсн үгдән сурһмҗин төрмүдт һол оньган өгв. Селвгчнр ода цуг сурһульмудт болн колледжмүдт көдлҗәнә. Нег учр-утхта даслурмуд ода олзлгдҗана. Ода цуг сурһульмуд «Мини сурһуль» ФГИС-т болн электронн сурһуль-эрдмин саңд орулгдсн бәәнә.
Эртәс бичкдүдин билг-дасмгинь цуг халхар делгрүллһнә көтлврт һол оньг өггдҗәнә. Терүнә төлә эсвин, йиртмҗ шинҗллһнә-номин, спортын, көгҗмин, билг-эрдмин көтлврмүд бәәнә. Кадрмуд белдлһнә төр сурһуль болһнд эклнә.
Тер мет багшин эрдмтә улст министр һол оньган өгв. Тедн кев-янзин күцәмҗиг теткх зөвтә. Йосн биш ухан багшиг сольҗ чадшго.
Яһад гихлә шагшавдын, оюни сурһмҗиг зуг багш өгч чадх. Тиим кевәр багшнрин көдлмшин таал ясрулад бәәх кергтә гиҗ Сергей Кравцов темдглв.
Түүнә хөөн «Сурһулин, вузин болн колледжин багшнрин болн номтнрин тоолвр» гидг төрәр өргн күүндвр болв. Цааранднь хургт орлцачнр болн гиичнр сурһуль-эрдмин күцәмҗин һәәхүлиг болн «Әрәсәд кесн зуульчллһн» гидг һәәхүл хәләв.
ҖААХАН Бадм