Көглтд суврһн босхгдв

Көглт селәнә тал дунд өөдм деер суврһн дүңгәҗ бәәнә. Селәнә әмтнә седвәрәр 2013 җилд эклҗ тосхгдсн Гегәрлтин суврһн байрин бәәдлд шидр секгдв. Оюни ик чинртә байрт орлцхар олн улс цуглрҗ ирв.

Селәнә бәәдл-җирһлиг ясрулҗ, бәәрн әмтиг хамцулҗ, төрскн һазран делгрүлх, ухата, медрлтә үрдән өскхд, селәнә нер өргҗ, уралан зүткхд Гегәрлтин суврһн эрк биш туслх гисн ухан-тоолвртаһар әмтн ирҗ, суврһндан зальврв. Суврһан шаҗна цуг зокалар босхч авсн бәәрн әмтн буйнта эн керг һазр-усна, цуг әмтә тоотын хөв-кишгинь холванд өскх гисн итклтә бәәнә.
Суврһиг үүлдврт оруллһна байрин керг-үүлдвриг йөрәлин үг келҗ, Хальмгин Шаҗн Лам, гевш Тензин Чойдак эклв. Көтчнрә района толһачин үүлиг цаг зуур дааҗадг Азота Санл, Көглт селәнә ахлачин үүлиг цаг зуур дааҗадг Дукмана Санл, Көглт селәнә медәт Инҗин Григорий бәәрн улсиг болн ирсн гиичнриг байрта эн йовдлла йөрәв. Байрин ик мөргүлд әмтн седкләрн төвкнҗ, иргчдән иткҗ орлцҗ зальврв.
ҖИРҺЛИН Кермн