Тула балһснд одв

Бар сарин 6-д Хаска Бату Тулан мүҗин губернатор Дмитрий Миляевла харһв. Селәнә эдл-ахун, зуульчллһна, сойлын, сурһуль-эрдмин халхсар нөкцлтхәр күүндсн билә. Эн туст ирлцңгү бооцан белдгдҗәнә.
– Тулан мүҗд «Большие калмыки» нертә селән бәәдгнь темдгтә болв. XVIII зун җилд Аюка хаана орлцлһтаһар болсн йовдлмудла эн селәнә тууҗ залһлдата болсинь медвидн. Хойр региона төсвсиг күцәхин төлә көдлмшән цааранднь даавртаһар бүрдәхвидн, – гиҗ Хаска Бату товчлв.
Тенд Хальмгин делегац Тулан мүҗин залврин элчнрлә хоккей наадв. Цогц-махмудан батрулсн деерән спортын эв-арһар нөкцлтән делгрүлхәр бас шунҗана. – Эн наадыг бүрдәсн Тулан мүҗин залврт ханлтан күргҗәнәв, – гиҗ Бату Сергеевич темдглсн болдг.
ОЛЬДАН Цаһан