Хальмг көгҗмин үүдәвр

Вчера, 10:35 | Таңһчин зәңгс » Сойл

Әрәсән «Сойл» гидг телеүзлд хальмг көгҗмин ик үүдәвр түрүн болҗ үзүлгдхмн. «Улсин нүүдл җирһл» («Кочевье народа») гидг нерәдлһтә хальмг көгҗмин наадн бар сарин 27-д олн хәләһәчнрин оньгт тусхагдҗана.
«Әрәсә-Сойл» телеүзлд бар сард җилин чилгчәр – «Улсин нүүдл җирһл» гидг көгҗмин нааднла таньлдх арһ цуг орн-нутгин хәләһәчнрт учрҗана. Москвад зәрм хәләһәчнр нааднла таньлдҗ чадв.
«Энтн маднд онц чинртә наадн болҗана. «Улсин нүүдл җирһл» гидг көгҗмин наадн Элстд III Нарт-делкән шар шаҗна хургиг сексн ик сәәхн үүлдвр болсмн», - гиҗ Хальмг Таңһчин Толһач Хаска Бату темдглсмн. Әрәсән олн келн-улсин сойлд килмҗән һарһсн ВГТРК-н һардач Олег Добродеевд таңһчин Толһач үнн седклин ханлтан медүлв.
Һаха сарин 25-д болсн өргмҗтә эн йовдлыг тодлулхмн. Өргн хальмг теегт үзүлгдсн тер өврмҗтә наадн ирсн кесг миңһн гиичнрт мартгдшгоһар тодлгдв. Теегин бәәдлд үзүлгдҗәдг тоотыг өдгә цага олн янзар герлтүлҗ, чинринь өргҗ, олна оньгт тусхаҗ цугтаг тууль-түүкд орсн Бумбин орнд күргсн болв. Өргн эңкр тег, артистнрин наадн, герлин болн әәһин өдгә цага цуг зүсн янзар кеерүлгдҗ, ни-эвтә кевәр ниицсн наадн йоста байр үүдәҗ, уданд тодлгдв. Бумбин орна евәлд цугтан тиигәд өргмҗтәһәр багтсн болдг.
Режиссер Андрей Болтенкон билгин күчәр, энүнлә хамдан белдвр кесн үүдәгч олн улсин, хальмг артистнрин билг-эрдмин күчәр, олн ведомствс болн коллективс күчн-чидлән хамцулҗ үүлдснә ашт иим ке-сәәхн наадн төрсн билә. Кезәнк тууль-түүк өдгә цага эв-арһсла ниицҗ, үүдәгч кевәр йосндан зүүднд орсн йовдлыг сергәҗ үзүлсн болв.
Европин захд Азийин нег нутг бәәхинь медҗ, энд байн тууҗта, кезәңк бурхн-шаҗта, өвәрц сойлта улс бәәхинь медсн ик цуглранд ирсн олн келн-улсин элчнр седкләрн байсад хәрв. Элстд үзүлгдсн тер сәәхн нәәрин дүүрәнд орлцх арһ ода орн-нутгин әмтнд учрҗана. Таңһчин әмтн болхла, дәкнәс Бумбин орндан зуульчлх седклтә бәәнә.
ҖИРҺЛИН Кермн

Видео