Әәдрхнә ик сурһульд мергҗлтән өөдлүлх

Шидр Әәдрхнә медицинск ик сурһулин һардач Сергей Поройский Хальмг Таңһчд көдлмшин кергәр ирәд, эрүл-менд харлһна көдләчнрин мергҗлт өөдлүллһнә төрәр болсн селвлцәнд орлцв. Харһлтыг Хальмг Таңһчин залврин Ахлачин дарук – таңһчин социальн делгрлтин, күч-көлснә болн көдлмшәр тетклһнә министр Өлзәтин Марина һардҗ давулв.

Эмчнр тавн җил болһн мергҗлтән өөдлүлҗ шүүврән өгх зөвтә. Эн җиләс авн мергҗлтән өөдлүллһнә туст шин некврмүд батлгдсн бәәнә, тегәд алс-зәәһин эв-арһар сурһуль сурч болшго. Тер учрар эмчнр таңһчин меҗә һатц һарч йовад, мергҗлтән өөдлүлх зөвтә болҗана.
- Бидн Әәдрхнә эмнлһнә ик сурһулин һардврла күүндәд, мана эмчнр көдлмшәсн тасрлт угаһар таңһчин эмнлһсин улд мергҗлтән өөдлүлҗ чадхин тускар үгцвидн. Әәдрхнә ик сурһулин багшнр мана таңһчур ирәд, энд эмчнрин төлә сурһуль давулхмн. Эн нөкцлтин йовудт мана эмчнрт талдан балһсдт йовҗ мергҗлтән өөдлүлх керг уга болхмн, – гиҗ таңһчин эрүл-менд харлһна министр Саран Булат темдглв.
Тер мет таңһчин нүүрлгч эмчнр Әәдрхнә орн-нутгин эмнлһнә ик сурһулин багшнрин тоод орад, эрүл-менд харлһна көдләчнрин мерҗглт өөдүллһнә кергт орлцхмн. Эннь Хальмг ик сурһулин медицинск дацңгиг багшнрар тетклһнд болн таңһчин эрүл-менд харлһна халхиг делгрүллһнд туслхмн.
Хальмг Таңһчин эрүл-менд харлһна министр Саран Булат Әәдрхнә медицинск ик сурһулин һардач Сергей Поройскийд нөкцлт батруллһнд ик тәвцән орулҗадг төләднь ханлтан өргв. Эн нөкцлт таңһчин эмчнр гертән мергҗлтән өөдлүлҗ, нег һазра улст өөдән чинртә дөң-тус күргҗ эрүл-менд харлһнд үнн кевәр цергллхд туслна, – гиҗ министр келв.
Чинртә төрәр болсн селвлцәнд Әәдрхнә медицинск ик сурһулин болн таңһчин эмнлһсин элчнр орлцв. Селвлцәнә ашар Әәдрхнә ГМУ-н багшнр П.Жемчуевин нертә таңһчин эмнлһнә улд эмчнрин төлә семинар давулв.