Энд олн келн-улсин элчнр сурна

Ода мана орн-нутгт техникин делгрлтд болн инженермүдин кадрмуд белдлһнд һол оньг өггдҗәнә. Эн халхар Хальмг ик сурһулин номтнр болн багшнр, оютнр Татарстан Республикин Иннополисин, Өмн үзгин федеральн, Аһшин, Әәдрхнә техникин ик сурһульмудла өргн залһлда бәрҗ нөкцлтән өргҗүлҗәнә. Тернь Хальмг Таңһчин бәәтхә, цуг орн-нутгин төлә инженерин кадрмуд белдлһнд ик дөңгән күргнә.
Тер мет тооһин тиңкмсин болн олн зүсн кергсл һарһдг бүрдәцсин һардачнр нег талвңд харһҗ дамшлтарн хувалцна. Терүнд МТС Лаб, Яндекс Такси, ВК, «Газпром», «Росатом» болн нань чигн ик кемҗәтә бүрдәцсин элчнр орлцҗ эрдмин кичәлмүд давулна. Җил болһн болдг тиим харһлтст багшнр дамшлтарн хувалцҗ медрлән гүүдүлнә, шин эв-арһ яһҗ олзлгдҗахин тускар күүнднә. Оютнр чигн тиим харһлтд шин эрдмин тускар соньн тоот медҗ авч, медрл хоршана. Бүрдәцсин һардачнрла харһҗ баһчуд өдгә цагт ямаран эрдм хамгин икәр керглгддгин туст цәәлһвр авад, цааранднь медрл хоршах седкл зүүнә.
Хальмг ик сурһульд талдан кесг регионас ирсн оютнр сурдгнь темдгтә. Кесг һазрас ирсн баһчуд мана таңһчд сурдг йовдл келн-улсин хоорндк хәрлцәг делгрүллһнд сән нилчән күргнә. «Орс болн корей кел даслһна ховр көтлвр Хальмг ик сурһульд күцәгдҗәнә. Тер эрдмиг дасхин төлә би нааран ирләв. Хальмг Таңһч дорд үзгин кев-янзта, энд кесг бумб, Бурхн Багшин Алтн сүм Элстиг сәәхрүлҗәхнь нанд таасгдв. Энд цуг келн-улс ниитә бәәнә, би энд сурхар шиидүв. Сурһулин хөөн чигн энд үлдхв гиҗ санҗанав. Ода би балһсна төвд бәәнәв, нан тал хальмг үүрмүдм гиичд ирнә. Эдн Бурхн Багшин Алтн сүмин, «Иньгллт» паркин, хальмг улсин авъясин тускар келҗ өгнә. Һазадын орн-нутгудас ирсн оютнр мана ик сурһульд бас олар сурчана, тернь намаг ик гидгәр өврүлв. Бидн олн зүсн керг-үүлдврмүдт хамдан орлцнавидн, терүнәс нань олна көдлмш күцәнәвидн. Би бичкдүдт дуртав, теднд шин медрл дасхснь нанд таасгдна», – гиҗ Донецк Улсин Республикәс ирсн багшин дацңгин оютн Дарья Ларичева келснь темдгтә.
Тиим оютнр хальмг вузд баһ биш, Әрәсән кесг һазрас оютнр энд сурхар седнә. Хальмг ик сурһуль одахн 55 җилин өөнән темдглв. Чеченск Республикин ик сурһулин тууҗин дацңгин һардач, доцент, тууҗин номин кандидат Сапият Цуцулаева төрскн ик сурһулян ончта өөнләнь йөрәв. Сапият Сайпуддиновна 1995 җилд Хальмг ик сурһулиг төгсәлә.
- Мини седклд онц орман эзлдг Хальмг ик сурһулин багшнрт болн оютнрт күцәмҗ дурдҗанав. Хальмг Таңһч нанд төрскн һазрла әдл өөрхн. Хальмг ик сурһулин тууҗин дацңгин багшнр номт болсндм туслв, нанд гүн медрл болн чик сурһмҗ өглә. Багшнртан ханлтан өргҗәнәв, теднә дөңгәр би номин хаалһд орад, ода Чечнян һоллгч вузд көдлҗәнәв. Хальмг ик сурһуль делгрҗ күцәмҗ бәрҗ йовна, Хальмг ик сурһулин җирһләр даңгин соньмснав. Мана Хальмг ик сурһуль күцәмҗтәһәр үүлдҗәхд һардач Салан Бадмин ач-туснь мөн. Терүнә һардврт мини төрскн вуз өдгә цагин эв-арһс делгрүлҗ Хальмг Таңһчин делгрлтд нилчән күргҗәнә. Мана Чеченск Республикин ик сурһульла чигн Хальмг ик сурһуль нөкцлтән өргҗүлҗәхнь темдгтә, тернь намаг ик гидгәр байрлулҗана. Намаг сурһҗ йовсн багшнр ода чигн көдлҗәнә, теднд хөв-кишг, амулң эдлҗ бәәхиг дурдҗанав», – гиҗ Сапият Сайпуддиновна келв.
Хальмг ик сурһулин номтнр Башкирин, Татарстана, Аһшин, Әәдрхнә, Ростовин, Москван болн Санкт-Петербургин вузмудла бат залһлда бәрнә, багшнр болн оютнр нөкцҗ үүлднә. «Хальмг ик сурһулин аграрн дацңгин магистрантнр гүн медрлән үзүлнә. Эднә диссертацс мал өсклһнә эв-арһ делгрүллһнд туслна. Өдгә цага шин эв-арһ олзллһнд эдн ик оньган өгнә. Эврә шинҗллтән цааранднь гүүдүлҗ, терүнә улд номин кандидатын диссертац харсч чадҗана. Терүнә төлә ода сән таал бәәнә. Яһад гихлә ода Хальмг ик сурһулин, махна болн үснә эдл-ууш һарһлһна, терүг эд-бод келһнә Поволжск НИИ-н улд диссертацин хүүв үүлдҗәнә, баһ наста номтнр белдлһнд тернь туслна», – гиҗ Поволжск НИИ-н һардач, биологийин номин доктор, РАН-а гешүн Марина Сложенкина келнә.
Тиим кевәр Хальмг ик сурһулин номтнр селәнә эдл-ахун, техникин, эмнлһнә, тууҗин болн кел даслһна олн салврар шинҗллтән өргҗүлҗ, Әрәсән кесг сурһулин бүрдәцслә, регионмудла сән залһлда бәрҗ орн-нутгин олн келн-улсин ниицлтд туслҗана.
ТҮРВӘН Һуна
Зургт: Хальмг ик сурһулин багшнр Дагестана үүрмүдлә харһсн кем