Дала Ламин Гегәнлә харһв

Шар шаҗнд шүтдг улсин Әрәсән төв оюни заллтын һардач гевш Йонтен Энткгт одад, тенд Дрепунг Гоманг хурлд одв. Шаҗна сурһуль дассн хурлд ирсн гевш Йонтенд Дала Ламин Гегәнлә харһх хөв учрв.

Шар шаҗна хойрдгч хургин көдлмшт орлцсна хөөн гевш Йонтен Дрепунг Гоманг хурлд одв. Энд эн хурлын ах багш гевш Джигме Гьяцола харһҗ күүндв.
Эврәннь багш гевш Тензин Чомпелин мендинь медҗ, сурһмҗлачин заавринь дәкн соңсч, урмд авв.
Эн хурл ик сурһульд сурсн цаган тодлҗ, гевш Йонтен гүн медрлтә болн өөдән цолта багшнрин һардврт шаҗна номин медрлин гүн учр-утхинь медҗ авсан ухандан дәкн нег сергәв.
Сурһмҗлачин заасн тоотыг тодлҗ авсн деерән терүг шинҗләд, цуг халхаснь оньган өгч бүрткәд дасдг бәәсән тодлв. Үзсн, соңссн, умшҗ авсн тоотан болһамҗтаһар шинҗлдгиг багшнрнь дасхснь гелңгүдин үүлдврт һоллгчнь болна. Орчлңд бәәдг, учрдг тоотыг цугинь шинҗлҗ медҗ болхмн гиҗ эдн үүлднә.
Йонтен гевш хамдан сурч йовсн гелңгүдлә чигн харһҗ, зәңгсәрн хувалцв. Төвдин, Бурятин, Туван һазрас ирсн баһчудла эн сурһуль сурсмн. Ода эднә кесгнь эврә һазртан бурхн-шаҗна номиг цәәлһҗ тархаҗ йовна. Зәрмнь энд эн хурлдан церглҗәнә. Эднә кен-негнь седклән тәвсн хаалһасн хаҗилго Бурхн Багшин номиг олн дунд тархаҗ йовна.
Эн йовлһнднь ик чинртә харһлт болснд гевш ик байрта бәәнә. Дала Ламин Гегәнлә харһсн кемдән гевш Йонтен кеҗ-күцәсн көдлмшин тускар келҗ өгәд, эн җил кегдх тоотын цәәлһҗ соңсхад, иргч зурала таньлдулв.
«Дала Ламла харһҗ күүндсн йовдл нанд ик урмдта болв. Эврәннь багшнрла күүндәд, үүрмүдләрн харһснь йоста кевәр чидл урһасн болв. Җилин эклц тиим сән евәлтә болв» - гиҗ Йонтен гевш байрарн хувалцв.
Хальмгт өсч-боссн көвүн Сергей Киришов Элстин 17-ч тойгта дунд сурһульд сурад, наснь дигт күрсн цагт бурхн-шаҗна хаалһд орхар шиидсмн. Аршаня хурлд ирҗ көдләд, җил болад ухата - тоолврта көвүг Энткгин һазрур шаҗна сурһульд йовулсмн. Нер туурсн Дрепунг Гоманг хурлд сурснаннь хөөн Йонтен гелң Бурхн Багшин Алтн Сүмд ах һардачар олн җил көдлв. Шаҗна медрлән гүүдүләд, гевшин цол зүүсмн. Бурхн Багшин ном цәәлһҗ делгрүллһнә халхар олн дунд ик көдлмш кеһәд, олна үүлдврт орлцад, тоомсрнь өсәд, гевш Йонтен шар шаҗнд шүтдг улсин Әрәсән оюни һол заллтын ахлач болҗ ода үүлдҗәнә.
Бурхн Багшин ном өргнәр делгрәд, олн улсин җирһлднь туслҗ йовхла, мана һол керг күцх. Күүнә җирһлд учрдг гем-зовлңгас, сәәһән хәәсн йовдлас гетлдг арһ маднд уга. Экономикин халхин төрмүдиг цугтнь хаһлҗ чадшговидн. Болв чадсарн әмтнд тусан күргҗ, буйнч үүлдвр күцәһәд бәәхлә, мана җирһл ясрх. Кен-негндән түшг болҗ, өр-өвч седклән медүлҗ бәәхлә төвкнүн, евәлтә җирһ учрхнь маһд уга», – гисн тоолвртан гевш Йонтен урдк кевәрн итклтә йовна.

УШКАНА Сувсн