Бичкдүдт чик сурһмҗ өгхәр

Сегодня, 12:27 | Общество, Таңһчин зәңгс, Зіњг, Сурєуль-эрдм

Одахн Элстд, таңһчин залврин сүүрин герт сурһулин өмнк эрдмин җил секлһнә байрин хург болв. Таңһчин сурһмҗлачнр, багшнр, салврин ветеранмуд болн баһ наста мергҗлтнр эн керг-үүлдврт орлцв. Әрәсән гегән –герлин министр Сергей Кравцов эн эрдмин көдләчнрт нерәдгдсн җил зарлсн болдг.
Өдгә цагин таалд бичкдүдт чик сурһмҗ болн бат медрл өгхин, теднә билгинь йилһҗ авхин төлә шин кергсл олзлгдна. Элст балһсна Хургин депутат, СВО-н ветеран Чумуда Санҗ-Һәрән Николай хотл балһсна 16-ч болн 27-ч тойгудта садмудын элчнрт өдгә цагин компьютер бәрүлҗ өгв (зургт).
- Эн белг мадниг ик гидгәр байрлулв, терүнә дөңгәр кесг төрәр соньн кичәлмүд бүрдәҗ болҗана,- гиҗ 27-ч садын һардач Лиҗин Алевтина байрин хургин йовудт келв. Эднә бүрдәцд өөдән мергҗлттә сурһмҗлачнр көдлҗәнә, эдн баһ наста үүрмүдтән дөңгән күргнә, дамшлтын кичәлмүд давулна. Садын кесг багд хальмг кел гүүнәр дасна, эн туст олн җилдән көдлҗәдг сурһмҗлачнр баһчудт бас дөңгән күргнә. Хальмг келнә багш Бадмин Галина бичкдүдт төрскн келнә туст сән медрл өгнә, бичкдүдин садт долан хонгт хойр дәкҗ кичәл болна. Баһ наста сурһмҗлачнрла дамшлтарн хувалцна.
Садт көдлҗәдг баһчудын тоод Утнасна Кермниг заах кергтә, баһ наста мергҗлт дөнтә-тавта бичкдүдиг сурһна, эднд кесг төрәр бат медрл өгнә. Эк-эцкнриг чигн эн сурһмҗллһна көдлмшт орлцулна, бичкдүдин заң-бәрцинь тоод авад, сурһмҗин көдлмшт кесг шин эв-арһ олзлна.
Тер мет Хөөчин Хаалһ бас баһ наста сурһмҗлач болҗ тоолгдсн бийнь багин бичкдүдиг сурһульд сәәнәр белднә. Энүнә экнь бас бичкдүдин садт кесг җилдән көдлсмн. Һурвн үртә баһ наста мергҗлт бичкдүдин садт көдлсн деерән фермер залудан чигн нөкд болх цол олна.
Баһчудын тоод Галина Скибко бас заагдв. Хальмг ик сурһуль төгсәснә хөөн эн балһсна 27-ч тойгта садт күч-көлснә хаалһан эклсмн. Галина Алексеевнан экнь бас багшар олн җилин эргцд көдлсн болдг.
Ода хотл балһсна 27-ч садт ясврин көдлмш давулгдҗана. Тосхачнр герин ораг шинәс бүркв. Җилин туршарт тер ясвр татгдҗана гиҗ бичкдүдин садын һардач зовлңшна. Болв дарук долан хонгт тер көдлмш төгсх гиҗ һардач болн сурһмҗлачнр нәәлҗәнә, тиигхлә бичкдүд хәрү садиктан ирх. Дарук 2027 җилд энд бат ясвр кегдх гиҗ зуралгдҗана.
Байрин хургт багш-логопед болн ах сурһмҗлач Светлана Седых Күндллһнә һашгар ачлгдсмн. Аһшин социальн-педагогин ик сурһулин доцент Светлана Геркушенко болн сурһуль-эрдмин көдләчнрин профсоюзин таңһчин хүүвин ахлач Эдән Цаһан йөрәв. Нүүрлгч сурһмҗлачнрт профсоюзин ачлврмуд бәрүлҗ өггдв. Байрин хургт бичкдүдин ансамбльмуд би биилҗ, ду дуулҗ билг-эрдмән үзүлв. Көтчнр селәнә келн-улсин садын һардач, сурһуль-эрдмин күч-көлснә ветеран Сельдикә Кема ветеранмудыг бас йөрәв. Нүүрлгч көдләчнр болн ветеранмуд таңһчин сурһуль-эрдмин министерствин Күндллһнә һашгудар болн Ханлтын бичгүдәр ачлгдв.
ҖААХАН Бадм

Видео