Кесг күн сөөһәр эмчд ирв

Шидр Элст балһсна поликлиникд «Эрүл-мендин сө» гидг керг-үүлдвр түрүн болҗ бүрдәгдв. Асхар 8 часас авн сө 1 час күртл әмтн эмнлһнд ирәд, эрүл-мендин бәәдлән шинҗлҗ, эмчин сүв-селвг авв. Өдртнь олн зүсн учрар эмчд ирдг арһ уга улс эн керг-үүлдврт орлцҗ, адһм угаһар шинҗллт кеһәд, эмчнрлә харһҗ чадв.
- Талдан регионмудт иим керг-үүлдврмүд сөөһәр давулгдҗахинь соңсад, теднә үлгүрәр мана эмнлһнд бас терүг бүрдәхәр шиидвидн. Сөөһәр әмтн иршго гиҗ санҗалавидн, тегәд түрүләд хойр терапевт көдлх гиҗ зуралсн биләвидн. Лу сарин 2-т әмтн эртәснь эмчд бичгдҗ чадв, тегәд хойр эмчд дарунь һучад күн ирхнь медгдхлә, дәкәд нег эмч көдлх болҗ һарв. Тегәд эндр һурвн эмч ут тоодан зун шаху кү хәләһәд, эмнлһнә туст сүв-селвгән өгхмн. Эднәс нань кардиолог, невролог, отоларинголог, травматолог, гинеколог, уролог, офтальмолог эрдмтә эмчнр бас дөңгән күргхмн. Эн мергҗлтнрт бийән үзүлхәр эмтн олар ирнә, тегәд сөөһәр эмчнрт ирҗ чадхнь олнд тааста болв. Эн керг-үүлдвр хамгин түрүнд ямр нег гем эртәснь илдкҗ, цаглань эмнлһ кеҗ дөң болхд туслх зөвтә. Эн керг-үүлдврт орлцсн улс УЗИ, ЭКГ, флюорографь, маммографь болн нань чигн шинҗллт кеҗ чадхмн. Мана эмнлһнә бүрдәцин көдләчнр һардврин седвәриг дөңнәд, сөөһәр көдлхәр шиидвр авснд ик ханлтан өргҗәнәвидн. Бидн цуһар нег керг күцәҗәнәвидн, тегәд нег һазра әмтнә эрүл-менд харлһна кергт орлцх санаһан медүлснь байрта. Эн керг-үүлдвр күцәмҗтәһәр давулгдхла, бидн цааранднь чигн терүг эрк биш бүрдәхвидн, - гиҗ поликлиникин ах эмчин дарук Цернә Наталья келв.
Наталья Тимофеевна бийнь эн эмнлһнд 2020 җиләс авн көдлҗәнә. Москва балһсна ик сурһульд сурад, 2009 җилд П.Жемчуевин нертә таңһчин эмнлһнд күч-көлснә хаалһан эклсмн. Эн җилмүдин эргцд эмч байн дамшлт хоршаһад, өөдән мергҗлттә болв, эрүл-менд харлһна бүрдәһәчин эрдм бас дассмн. Эн керг-үүлдврин йовудт Цернә Наталья эмчнр Алексән Екатеринала болн Мельтенә Эрвенала хамдан ирсн күн болһнд килмҗән тусхаҗ, эрүл-мендин бәәдлинь шинҗләд, дөң-тусан күргв.
2022 җиләс авн поликлиникд диспансеризацин шишлң хора бәәнә, нааран әмтн олар ирнә. Тер мет эмнлһнд бүрдәгдсн эмчнрин баг күч-көлснә коллективст көдләчнрин эрүл-мендин бәәдлинь дор ормднь шинҗлнә.
«Эрүл-мендин сө» гидг керг-үүлдвр бүрдәгдсиг эмнлһнд ирсн улс таасад, эмчнрин седвәриг дөңнв. Келхд, кесгнь хамдан көдлҗәдг үүрмүдтәһән, элгн-садтаһан ирснь медгдв. Элст балһснд бәәдг медәт Кукан Очр сөөһәр эмчд ирҗ болхиг соңсад түрүн авгтан итксн угав гиҗ мана күүндврт орлцҗ келв. Медәт өрәл җил болад, нүднә эмчд ирҗ эмнлһнә туст сүв-селвг авна. Сөөднь нөр күрхш тегәд цаган тустаһар давулхин төлә эн эмчд ирхәр шиидв. Очр Николаевичин келсәр, эн өдр болһн йовһар йовад, цогц-махмудан батрулна. Иим керг-үүлдвр бүрдәсиг эн өөдәнәр үнлҗ, иргчдән дәкәд эн кергт орлцхан медүлв.
Эмчд орхар хамдан чеерүдән күләҗәсн улс хоорндан күүндәд, балһсна поликлиникин баһ наста һардвр көдлмшән ясрулхин төлә олн зүсн шин эв-арһс олзлҗ, нег һазра улст сән чинртә туслмҗ күргхәр шунҗахиг темдглв. «Эрүл-мендин сө» гидг керг-үүлдврт ут тоодан 300 күн орлцв.
ДООҖАН Наталья