Цергчнрин зөв харслһн – һол оньгт

Сегодня, 12:23 | Политика, Таңһчин зәңгс, Зіњг

Давсн долан хонгт Хальмг Таңһчин Улсин Хуралын (Парламентин) сессьт хәләгдсн төрмүд дунд күүнә зөв харслһна төрәр үүлддг күцц зөвтә элч Валерий Чуб тооцаһан өгәд, цергә шишлң керг-үүлдврт орлцачнрин болн теднә өрк-бүлмүдин зөв харслһна тускар онц келв. Цергчнрин социальн теткврин, эрүл-менд батруллһна, демин мөңг авлһна болн нань чигн төрмүд хаһлхд нөкд болхиг сурад, ут тоодан 965 эрлһн орулгдсн болв.
Күүнә зөв харсдг күцц зөвтә элч Әрәсән харслтын Министерствлә, орн-нутгт күүнә зөв харсдг күцц зөвтә элчлә болн Әрәсән Улан Кирслә бат залһлда бәрҗ үүлддгиг Валерий Чуб заав. Зәңг-зә уга геедрсн, бәрәнд авгдсн цергчнриг олҗ авлһна төрмүдиг эднлә хамдан хаһлна. Тер мет мана цергчнр даалһвран күцәҗ йовдг әңгүдлә, цергә прокуратурла болн полицлә, талдан регионмудт күүнә зөв харсдг элчнрлә бат залһлда бәрҗ, олн зүсн төрмүд хаһллһнд нег-негндән нөкд болна. Тиигәд, нидн Әрәсән харслтын Министерств мана нег һазра хойр күн бәрәнд бәәхиг иткүләд, тедниг сулдхлһнд дөңгән күргв.
- Мана хайгар орҗ ирсн эрлһсин икңкднь зәңг-зә уга геедрсн болн бәрәнд бәәдг цергчнриг олҗ авхд, цергә-эмчин комиссьт орхд, социальн теткврин төр хаһлхд, иргнә бәәдлин то-дигин бүрдәцәс иткл цаас авхд дөң болхин тускар келгднә. Тер мет әмнәсн хаһцсн цергчнрин цогцинь олҗ авад герүрнь авч ирхд дөң болхиг, шав авсна хөөн эмнлһнд күргхиг элгн-саднь бас сурна. Цергч болһна төрт бидн орлцад, талдан бүрдәцсин дөң кергтә болхла, теднә орлцлһтаһар тусан күргхәр шуннавидн. Цергә шишлң керг-үүлдврт орлцачнрин зөв харсхин төлә таңһчин цергә комиссариатла болн «Төрскән харсачнр» шаңһа саңгин таңһчд үүлддг әңглә бас хамцу үүлднәвидн. Зәңг-зә уга геедрсн цергчнрин өрк-бүлмүдин эрлһс «Төрскән харсачнр» шаңһа саңгин таңһчд үүлддг әңгд орулгдҗ, теднд дөң күрглһнә керг-үүлдврмүд дарунь бүрдәгднә, – гиҗ Валерий Чуб цәәлһв.
Цергә шишлң керг-үүлдврт орлцачнр эднә зөв харслһнд дөң болхиг сурад, олн зүсн төр босхна. Тиигәд, Н. иргнә авальнь демин мөңгиг бүклднь эс өгснә туст һундлан медүлв. Күүнә зөв харслһна төрәр үүлддг күцц зөвтә элч цергә прокуратурин дөңгәр бүртклһнә керг-үүлдвр давулсна ашт авальнь церглҗ йовсн әңгнь демин мөңг авхин төлә то-диг эс орулснь илдкгдв. Аштнь Н. иргнд демин мөңгинь бүклднь өгв. Х. иргн «Зөрмгин төлә» гидг шаңһа ачлвр авхд туслхинь сурв. Цергә шишлң керг-үүлдврт орлцач Әрәсән Президентин зәрлгәс иштә эн өөдән ачлврар ачлгдсмн, зуг терүгинь бәрүлҗ өгсн уга болв. Күүнә зөв харслһна төрәр үүлддг күцц зөвтә элч таңһчин цергә комиссариатд эрлһ орулсна ашт Х. иргнд ачлвринь бәрүлҗ өгв. Ш. иргнә экнь бас нөкд болхиг сурад, хойр көвүнь цергә шишлң керг-үүлдврт орлцад, зөрмгән үзүлснә тускар медүлв. Ууһн көвүнь цергч бәәсмн, отхн үрнь болхла 2022 җилд мобилизацин йовудт СВО-д орлцдг болв. 2024 җилин намрар ик көвүнь әмнәсн хаһцв, тегәд насни дигт күрәд уга һурвн үр асрҗадг отхн көвүһинь цергәс буулһхд дөң күргхиг күүкд күн сурв. Әрәсән харслтын министрин зааврас иштә цергә шишлң керг-үүлдврин йовудт өөрхн элгн-саднь әмнәсн хаһцсн улсиг цергә даалһвр күцәлһнд йовулҗ болшго. Тегәд Ш. иргн герүрн хәрҗ ирв. Цергә шишлң керг-үүлдврт орлцач Ч. иргн нидн үвләр амрлһнд хәрҗ ирсн цагт авальнь гемин уршгар генткн сәәһән хәәҗ. Җил күрәд уга бичкн көвүг болн гемтә-шалтгта экинь хәләх нань талдан күн уга болҗахас иштә эн залу цергәс бууҗ ирхд туслхинь сурв. Әрәсән харслтын Министерствлә залһлда бәрәд, эн төриг дарунь хаһлҗ.
Күүнә зөв харслһна төрәр үүлддг күцц зөвтә элч Валерий Чуб цергчнрин зөв харслһна төрмүд хаһллһнд олн бүрдәцс нөкд болдгиг темдглв. «Төрскән харсачнр» шаңһа саңгин таңһчд үүлддг әңг, таңһчин юристнрин ниицән, цергә шишлң керг-үүлдврт орлцачнрин өрк-бүлмүдин олна бүрдәц эднлә хамцу үүлдҗ, цергә даалһвр күцәҗәдг нег һазра улсин төрмүдт шунмһаһар орлцдгиг Валерий Чуб темдглҗ, эднә нөкцлт чинртә төрмүд хаһлхд туслна гиҗ ашлв.
ДООҖАН Наталья

Видео