Ик ачта ээҗ

Цергә шишлң керг-үүлдврин йовудт Донецк Улсин Республикин Северск балһсиг сулдхлһнд залу-зөрмгән үзүләд, даалһвриг өөдән кемҗәнд күцәһәд Әрәсән Президент Владимир Путинд бәрлдән болсн һазрас тооцаһан өгсн хаһачнрин батальона 6-ч тойгта ротын командир Очр-һәрән Нарн Әрәсән Баатрин өөдән нер зүүснь мана таңһчин цуг әмтнд ик байр үүдәв. Энүнә өөрхн элгн-саднднь, нег үлү экднь эннь хойр дам ик бахмҗта йовдл болснь мөн.
Әрәсән Президент җил болһн давулдг «Җилин аш» гидг харһлтд нег һазра мана дәәч орлцад, терүнә йовудт орн-нутгин толһачин сурврмудт хәрү өгснь бас темдгтә болв. Владимир Владимирович харһлтын йовудт Очр-Һәрән Нарнла харһад күүндәд, бәәдл-җирһлиннь тускар соньмссна тускар келәд, зөрмг дәәчин төлә экнь, өрк-бүлнь ик чинр зүүҗәхиг темдглв. Шидр Әрәсән Баатрин эк Кульменә Любовь Әрәсән күүкд улсин ниицәнә «Эк-эцкин туурмҗин одн» гидг медаляр ачлгдв. Лаганя района һардвр болн күүкд улсин ниицәнә әңг ачта ээҗд белгән бас бәрүлҗ өгв.
Кульменә Любовь Улан Хол селәнд 1939 җилд һарсмн. Хальмг улсиг цааҗла харһулад Сиврүр нүүлһхлә эднә өрк-бүл Алтан крайин Алейск районд тусв. Тенд 8 класс төгсәв. Төрскн һазрурн хәрҗ ирхләрн эн Яшкуль селәнд зурһан сара сурһуль төгсәһәд, тоочин эрдмтә болв. Любовь Горяевна хулд-гүүлгәнә халхар олн җилдән көдлсмн. Алексей Сергеевич авальтаһан һурвн үрндән чик сурһмҗ өгв. Ода ээҗ тавн ач-зеетә, 4 җич-зеенчтә. Цергә шишлң керг-үүлдврт орлцҗадг Нарн көвүндән Любовь Горяевна зовҗ, эрүл-менд хәрҗ иртхә гиҗ өрүн болһн зальврна. Көвүнәннь һардврт церглҗ йовдг дәәчнр чигн энүнә төлә бас һарлдсн көвүнләнь әдл өөрхн болна.
- Мана ээҗин җирһлин хаалһ адрута болв, эн бичкндән дәәнә болн тууврин зовлң дааҗ һарсмн. Насн-җирһлиннь туршарт көдләд, отг-әәмгтән күндтә болв. Күн болһн ямр чигн кергиг даавртаһар күцәҗ, үнн-чик хәләцтә, келсн үгдән эзн болх зөвтә гиҗ ээҗм һурвн үрндән сурһмҗ өгдг бәәсмн. Ода бидн бас ээҗин сүв-селвгиг соңсад, энүнә зааврар бәәнәвидн. Ээҗм күүкдиннь, ачнр-зеенриннь болн җичнриннь җирһлд орлцҗ, итклтә түшг болна. Мана ээҗ цаһан седклтә, өр-өвч күн мөн - гиҗ Виктория ач күүкнь келнә.
Күүкд улсин нарт-делкән Өдрлә Любовь Горяевнан герт өрүн эртәс авн олн гиичнр цуглрҗ, эңкр экән болн ээҗән йөрәхәр цуглрна.

ЗУРГТ: Әрәсән Баатр Очр-Һәрән Нарн Любовь Горяевна эктәһән болн Виктория күүктәһән
ДООҖАН Наталья