Өөдән ачлвр авсн олна үүлдәч

Мана газетин итклтә умшач Довган Валентина шидр нертә советск нисәч, полковник, күүкд улсас цугтаһаснь түрүлҗ Советин Союзин Баатрин өөдән нер зүүсн болн Социалистическ Күч-көлснә Баатр Валентина Гризодубован нертә медаляр ачлгдсна тускар соңссн маднд чигн байрлх саам учрв гиҗ келх кергтә. Хальмг Таңһчин залврин Ахлач Босхмҗин Гилән ачлвринь бәрүлҗ өгсн йовдл байрин ик керг-үүлдврт хүврсн болдг (зургт). Йириндән болхла Валентина Батаевна олнла ээлтә, үгтә- күүртә, серглң- дерглң медәт болна. Хая нег редакцд орҗ ирсн кемдән газетин бәәдл-җирһлин тускар сурсн деерән умшачнрин то өсчәнү угай гиҗ даңгин соньмсдмн.
Насни турштан сурһуль-эрдмин халхар көдләд, ик дамшлт хоршасн багш оньдин ик күцәмҗ бәрҗ йовсн мөн. Сиврин хөөн Ик Буурла района Орһахна дунд сурһуль төгсәсн баахн күүкиг Целинн районур һарһад, эклц классмудын багшин үүл даалһсн бәәҗ. Минь тиигхд тууврас хәрҗ ирәд, таңһчан шинәс босхчасн кемд мергҗлтнр икәр керглгдҗәсн болдг. Дарунь эн Сарпулин багшнрин күрәлң төгсәһәд, олн җилмүдт Деед Яшклын дунд сурһульд багшлсн мөн.
-Тиигхд тәрә-темс урһадг сурһульчнрин багиг һардад, цугәрәсән марһаст орлцад, нүүрлгч ормс эзлҗ йовсан даңгин тодлнав. Далдгч җилмүдт махна малын номин- шинҗллһнә күрәлңгин әңг эн селәнд бәәршлҗәсмн, тегәд энүнә һардач дәәнә ветеран, номт, бичәч Нармин Морхаҗла нөкцҗ үүлдәд, номин халхар гүн чинртә шинҗллтин көдлмш күцәҗ йовснь ода бас бахмҗ үүдәнә. Нег үлү эн күрәлңгин тәрәнә эк урһалһна болн малын хот кеҗ һарһлһна әңгд көдлҗәсн номтнр Б. А. Гольдваргла болн В. И. Усалкола тер цагт чигн хамцу төсвс күцәһәд, мини сурһульчнр социалистическ дөрлдәнә дииләчнр болҗ, шаңһа ачлврар мөрәлгдснь ода күртл мартгдхш, - гиҗ Валентина Батаевна бахтна.
Эн багшин һардврт селәнә сурһульд үүлдҗәсн цергә нисәч, Советин Союзин Баатр В. В. Талалихинә нер зүүҗәсн пионермүдин бүрдәцин гешүд москван үүрмүдләрн бат залһлда бәрәд, җил болһн хаврин сармудт В. И. Ленинә Мавзолейд олн зүсн өңгтә бамб цецгүд күргдг бәәҗ. Дәкәд болхла Довган Валентинан сурһульчнь номин халхар орн- нутгин марһанд ончрад, зургнь«Пионерская правда» газетин түрүн халхд барлгдснь ода күртл медәтин седкл байрлулна.
Ачта амрлһндан һархиннь өмн дамшлтта багш Элстд көдләд, дорас өсч йовдг үйнр эврә һазр-усна йиртмҗиг әрүнәр хадһллһна болн эднд төрскнч сурһмҗ өглһнә туст чигн чидлән нөөлго бас үүлдсн болдг. Мел өмәрән зөрдг седклтә, сән дурарн кен- негнднь нөкд болҗ, даалһсн кергиг сән чинртәһәр күцәдг Довган Валентина олна керг- үүлдврт чигн шунмһа кевәр орлцдгинь соңсад нам өврсн угав. Юңгад гихлә минь тиим авцта, сән заңта күн эн болҗана гиҗ сангдв.
«Дәәнә бичкдүд»гидг ниицәнә гешүн болад, үзмҗтәһәр көдлсинь үүрмүднь бүләнәр тодлна. Өдгә цагт болхла Валентина Батаевна «Хальмг Таңһчин күүкд улсин хүүв»гидг олна бүрдәцин президиумин гешүнә үүл дааҗ, олна халхар темдгтә көдлмш күцәҗәнә гих кергтә. Келхд, олна үүлдәч Довган Валентина 2023 җилд барас һарсн «Орһахн болн орһахна улс»гидг хойр ботьта ик дегтр барт белдлһнд орлцсиг чигн нег һазра улснь өөдәнәр үнлсмн.
Седкл туссн авальтаһан өркән өндәлһәд, хойр үрән җирһлин хаалһднь орулад, кү кев. Ода элкндән шахад өскчәдг дөрвн ач- зееһән, тавн җичән үзхлә, чееҗ девтәд, седкл байрлна, гиҗ медәт бахтсн бәәдлтәһәр келнә. Үгән ашлад, өөдән ачлвр авсн Валентина Батаевна өөрдҗ йовх күүкд улсин байрла таңһчин сәәхләсиг йөрәҗ, бүлән үгмүдән нерәджәнә.
Шагҗин Любовь