Хальмг бер Янан хөв-кишгнь

07-03-2026, 12:01 | Общество, Таңһчин зәңгс, Зіњг, Күн болн җирһл

Мана таңһчд олн келн-улсин элчнр хоорндан ниитәһәр бәәнә. Хальмг, орс, маңһд, хасг, киргиз улс йилһл уга олн халхар көдләд, таңһчин делгрлтд тәвцән орулҗана. Тер мет күүкд улс көдлн бәәҗ үрдән өскәд, өрк-бүлиннь һулмтан хадһлад бәәнә.
Элст балһснд өсч-боссн Яна Оселедько хальмг көвүн Намрун Александрт дуран өгәд, арвн тавн җил хооран өркән өндәлһв. Эндр Намруевихн зурһан үртә ниитә өрк-бүл болна. Һурвн көвүнә болн һурвн күүкнә күцәмҗнь бахмҗ үүдәнә. Арвн хойр җилдән Яна Владимировна Элстин 26-ч тойгта бичкдүдин садт, өдгә цагт болхла арһлачин бүрдәцд көдлҗәнә.
Хальмг-орс бүлд өсчәдг көвүд-күүкд эк-эцкиннь авг-бәрциг сәәнәр меднә. Ууһн хойр көвүнь тхэквондо спортар соньмсна, олн зүсн чинртә марһаст ончрна.
Яна йоста хальмг бер болад, авалиннь элгн-садн дунд тоомср болн күндллһ олсн болдг. Энүнә келсәр, зурһан үрән аав-ээҗин авъясар өскчәнә. Баахн эк-эцк хойр өдртән көдлмштән бәәдг учрар эднд аав-ээҗнь нөкд болна. Ачнран сурһуляснь болн бичкдүдин садас тосад, гертнь авч ирнә. Яна бер хадм эк-эцкдән даңгин ханлтта бәәнә.
– Альхн деерән өскчәдг мана зурһан алтн үрн хоорндан ниитәһәр бәәҗ, нег-негндән дөң-тусан күргнә, энүг үзхлә, зүркм байрар дүүрнә. Чик сурһмҗ өгәд, җим хаалһд орулад, хөв-кишгинь үзхлә терүнәс даву үнтә юмн уга, гиҗ Намрун Яна темдглв.
КАРСАНА Евгения

Видео