Эрүл-менд харлһна көдләчнрт – ханлт

Мендвт, «Хальмг үннәхн!»
Би Яшкулин района Чилгр селәнд бәәдг тана умшачв.Маңһдур орн-нутгт хаврин байр темдглҗ,таңһчин сәәхләсиг чигн хамгин түрүнд мана залу улс йөрәхнь маһд уга. Би болхла ачта амрлһнд бәәдг медәт болсн деерән эрмдгтә күн болҗанав. Тегәд гемин уршгар района эмнлһнд орад, цогц-махмудан батрулх кергтә болна. Мана селәнә эрүл-менд харлһна көдләчнр бас кергтә цагла дөң-тусан күргәд, эдгәхәр шундгнь чигн мел үнн юмн.
Тегәд күүкд улсин сән Өдр угтҗ,цаһан седклтә, өр-өвч медицинск эгчнриг, санитарксиг йөрәҗ, ханлтан өргхәр седләв. Эн саамд нег үлү невролог эмч Одган Аннад,терапевт Үлмҗин Кермнд бүлән үгмүдән нерәдҗ, эднә керг- үүлиг өөдәнәр үнлҗәнәв. Эдн цугтан кен-негнләнь ээлтә,гемтә улст килмҗән тусхадг җөөлн заңта улс болҗана, - гиҗ мана редакцин хайгар орҗ ирсн Баган Хаалһин Галинан бичгт келгдҗәнә.
Энүнә үгәр, шидрхн гилтә района эмнлһнә терапевтическ әңгд бийән эмнүләд һарсн болна. Һар- көлнь зовадган уурад, цоцг-махмуднь батрад, чидл орсн болҗ медгдв. Эн әңгд көдлҗәдг улс күн болһнд оньган тусхаҗ, арднь орҗ эмндгнь нег үлү медәтнрт омг өгч урмдулсна тускар чигн эн зәңглв.
Тегәд хальмг газетәр дамҗад, Галина Халгаевна Яшкулин района төв эмнлһнә болн Чилгр селәнә эрүл-менд харлһна көдләчнриг моһа сарин 8-лә халун зүркнәсн йөрәһәд, цугтаднь хөв-кишг, сән- сәәхн, байрта-бахта бәәдл-җирһл дурдв.

Барт белдснь Шагҗин Любовь