Олн үртә баахн өрк-бүлмүдиг йөрәв

Шидр Хальмг Таңһчин залврин Ахлач Босхмҗин Гилән О.Шунгаеван нертә нилхд төрлһнә Төвд одад, эмнлһнә бүрдәцин үүлдврлә таньлдҗ, 65 җилин өөнлә йөрәв. Тер мет эн өдр герүрн хәрҗәдг Бальджиковихнә болн Джульджуевихнә өрк-бүлмүдиг һурвдгч үрнь һарснла йөрәһәд, Хальмг Таңһчин Толһачин белг бәрүлҗ өгв.
Целинн района Троицкое селәнд бәәдг Дольган болн Эвелина Бальджиковихнә өрк-бүлд лу сарин 25-д күүкн һарв. Ууһн Арина күүкнь болн Давид көвүнь Заяна дү күүкн һарснд ик байрта бәәнә. Эдн Елена Конуровна ээҗтәһән болн эцктәһән нилхд төрлһнә Төвд ирәд, экән болн дү күүкән тосч авв. Эднә өрк-бүлиг эн ончта болн байрта йовдлла йөрәхәр кесг гиичнр ирснд эдн йосндан алң болв. Хальмг Таңһчин залврин Ахлач Босхмҗин Гилән олн үртә баахн өрк-бүлиг йөрәһәд, эдн цуг баһчудт үлгүр-үзмҗ болҗахинь темдглв. «Баһчуд олн үртә болснь эднә өрк бат, ниитә болҗахиг герчлҗәнә. Тадн үрдән асрад, төрскн һазртан бәәх санан-седклтн бахмҗ үүдәнә. Эврә үрдтән чик сурһҗм өгч, хөвтә сәәхн җирһл эдлхит гиҗ ицҗәнәвидн. Олн үртә өрк-бүлмүдиг дөңнлһнә шаңһа көтлврмүд бәәнә, демин мөңг өгнә, тегәд дәкәд чигн үр һарһад, өнр-өсклң болтн. Баахн өрк-бүлмүдин то өсхлә, мана таңһчин иргчнь сән-сәәхн болх», - гиҗ Гилән Герасимовна баһчудыг йөрәв.
Дарунь таңһчин залврин Ахлач таңһчин эрүл-менд харлһна министр Саран Булатла болн нилхд төрлһнә Төвин ах эмч Бадмин Җирһллә хамдан эмнлһнә бүрдәцин әңгүдт углҗ тәвгдсн кергсл хәләҗ, саата күүкд улсин болн көдләчнрин төлә ямаран таал тогтагдсиг хәләв. Эн җил нилхд төрлһнә Төв 65 җилин өөнән темдглҗәнә. Советин Союзин Баатр Басан Городовиковин һардврт таңһчд нилхд төрлһнә Гер тосхгдв, нилхдин болн саата күүкд улсин эрүл-менд харлһна төрмүдт ик оньг тусхагдсмн. Эмнлһнә бүрдәцин делгрлтд энүг 14 җилин туршарт һардҗ йовсн нертә эмч Шунган Октябрина ик тәвцән орулсмн, тегәд эндр нилхд төрлһнә Төв ачта эмчин нер зүүҗәдг болна. 2025 җилд «Өрк-бүл» гидг келн-улсин төсвин йовудт төвин материальн-техническ ул батруллһнд орн-нутгин шаңһас 130 сай арслң йилһгдсмн. Эн мөңгәр өдгә цага кергсл хулдҗ авгдад, төвин әңгүдт углҗ тәвгдв. Эмнлһнә бүрдәцин эмчнр мергҗлтән өөдлүлҗ, саата күүкд улст өөдән чинртә дөң күргҗ, эрүл-менд нилхд һархин төлә өдгә цага эв-арһс олзлна. Олн җилин эргцд энд көдлҗәдг эрүл-менд харлһна көдләчнр баахн үүрмүдтәһән байн дамшлтарн хувалцҗахиг таңһчин залврин Ахлач үнлв.
Босхмҗин Гилән О.Шунгаеван нертә нилхд төрлһнә Төвин һардврт Хальмг Таңһчин залврин Ханлтын бичг бәрүләд, кир уһадг кергсл белглв. Эндр төвиг һардҗадг баахн эмч Бадмин Җирһл ах үүрмүдиннь кеҗ-күцәсиг хадһлад, эндрк өдрин некврлә ирлцҗ таңһчин күүкд улст сән чинртә дөң күргҗ чадмг кевәр көдлҗәнә гиҗ Гилән Герасимовна темдглв. Цуг таанрт ик ханлтан өргҗ, хөв-кишг дурдҗанав, - гиҗ таңһчин залврин Ахлач харһлтыг товчлҗ келв.
Харһлтд Хальмг Таңһчин залврин Ахлачин дарук – таңһчин социальн делгрлтин, күч-көлснә болн көдлмшәр тетклһнә министр Өлзәтин Марина, таңһчин эрүл-менд харлһна министрин дарукс Нәәмнә Бембә болн Сарңга Гиләш орлцв.
ДАВАН Наталья