Эмнлһнә халхар туслмҗан күргәд

Сегодня, 12:50 | Общество, Таңһчин зәңгс, Зіњг, Эрўл-менд харлһн

Эн сарин эклцәс авн мана таңһчд «Эрүл-менд бәәтн!» гидг керг-үүлдврин дарани девсң болҗана. Шидр эмчнрин баг Приютна района Первомайский селәнд одсн билә. Селәнә бәәрн улс терүнд шунмһаһар орлцҗ, эрүл-менд харлһна көдләчнрлә харһҗ эрүл-мендин бәәдлән шинлҗлв. Селәнә эмнлһнә көдләчнр эн кергиг дигтә-даратаһар бүрдәснә ашт әмтн кергтә мергҗлтнрт бийән үзүлҗ, эрүл-мендән батруллһна халхар селвгинь авв.

Селәнә эмнлһнд тәвн җилдән көдлҗәдг Нәдвдә Надежда «Земск фельдшер» гидг көтлврин йовудт күч-көлснә хаалһан эклҗәдг Атун Татьянанд нүдн-амн болна. Надежда Ивановна Элстд медицинск училищ төгсәснә хөөн төрскн селәндән хәрҗ ирәд, олн җилин эргцд эмнлһнд көдлҗәнә. Эрүл-менд харлһна ачта көдләчиг селәнд ик-бичкн уга тевчҗ күндлнә. Кесгнь бичкнәсн авн энүнә хәләврт өсәд-босад, ода бийснь эк-эцкнр болад үрдән дахулҗ ирнә. Атун Татьяна бас бичкндән селәнә эмнлһнд ирҗ, Надежда Ивановна олн зүсн тәрлһ кедг бәәсиг тодлна. Ода эдн хамдан көдлҗ, нег һазра улст нөкд болна.
- Төрскн селәндән көдлхәр ирсндән би байрта бәәнәв. Надежда Ивановна нанла байн дамшлтарн хувалцҗ, әмтнд тәрлһ эс гиҗ шинҗллт кехиг зааҗ өгнә. Кергән йилһән сәәнәр меддг, өөдән мергҗлттә ах үүрин үлгүрәр көдлмшән даавртаһар күцәхәр шуннав. Надежда Ивановна цаһан седклтә, әмтнлә ээлтә, тевчңгү, күн болһнд килмҗән тусхаҗ дөңгән күргхәр адһна. Эн кенд кезә ямаран шинҗлт кехинь, эмнлһнә туст эмчин селвг кергтәһинь меднә. Мана селәнүр эмчнрин баг ирхиг медәд, бидн эртәснь цуг шинҗллт кеһәд, әмтнә цаасд белдвидн. Иим сурһмҗлгчин һардврт би күч-көлснә хаалһан эклснь нанд бахмҗта болна, - гиҗ Атун Татьяна келнә.
Татьянан наһц эгчнр Валентина болн Ольга Глушко Приютна района эмнлһнд олн җилдән көдләд, эрүл-менд харлһна халхд ик тәвцән орулсмн. Эк-эцкиннь селвгәр болн наһц эгчнриннь үлгүрәр Татьяна дунд сурһулян төгсәснә хөөн Сарпуль балһсна медицинск колледжд орв. Хәрд һарад, Николай авальтаһан цөөкн җилдән Сарпуль балһснд бәәв. Хойр җил хооран баахн өрк-бүл Первомайский селәнд нүүҗ ирх шиидвр авв. Герин эзн эврә дөңцл эдл-аху бәрҗәнә, Татьяна бер болхла селәнә эмнлһнд ирҗ көдлв. Селәнд дунд сурһуль, бичкдүдин сад, сойлын Гер бәәнә. 2022 җилд «Эрүл-менд харлһн» келн-улсин төсвин йовудт эмнлһнә шин гер тосхгдв.
- Мана орн-нутгин болн таңһчин һардвр селәнә һазрт көдлдг эрүл-менд харлһна көдләчнриг дөңнҗ, олн керг күцәҗәхнь маднд ик урмдта болна. Келн-улсин төсвсин йовудт мана селәнд шин эмнлһн тосхгдв. Энд эмчин, тәрлһ болн шинҗллт кедг, өдрәр ирҗ эмнлһ авдг салу хорас бәәнә. Мана селәнә әмтн энд өдрәр эмнлһ авад, эмчин хәләврт эрүл-мендән батрулҗ чадна. ЭКГ шинҗллт кехин төлә кергсл бәәнә. Района эмнлһнә эмчнр энд диспансеризацин йовудт әмтнә эрүл-мендин бәәдл шинҗлнә. Таңһчин Толһачин седвәрәр «Эрүл-менд бәәтн!» гидг керг-үүлдвр бүрдәгдв, тегәд эмчнрин баг мана тал ирснд әмтн байрлв. Эн керг-үүлдврин йовудт 56 күн эмчд бийән үзүлв. Мана селәнә эмнлһнә эмч Нусхинә Галина әмтнд дөңгән күргҗ, эмнлһнә туст селвг өгч, хамгин түрүнд медәтнрт, хуучта болн гемтә-шалтгта улст оньган тусхана. Би «Земск фельдшер» көтлврт орлцад шаңһа дем авлав. Селән һазрт көдлдг эрүл-менд харлһна көдләчнрт сар болһн дөңцл мөңгн өггднә. Цуг эннь селән һазрт бәәдг улст чинртә медицинск дөң күрглһнд туслна. Мана эмнлһнә көдләчнр хоорндан ниитә бәәнә, нег-негндән нөкд болҗ хамцу үүлднә, - гиҗ Татьяна Батровна товчлв.
ДООҖАН Наталья
ЗУРГТ: Приютна района
Первомайский селәнә эмнлһнә көдләчнр Нәдвдә Надежда болн Атун Татьяна

Видео