Эмчнр хол селәдт одв

Хальмг Таңһчин Толһачин седвәрәр бүрдәгдсн «Эрүл-менд бәәтн!» гидг керг-үүлдврин йовудт эмчнрин баг хол селәдт одад, бәәрн улст дөң-нөкд болҗана. Давсн долан хонгт эмчнр Ик Буурла района Южный, Октябрьск района Цаһан Нур селәдт одв.
Моһа сарин 4-д эмчнр Южный селәнд көдләд, ут тоодан 91 күүнә эрүл-мендин бәәдл шинҗлв. Эмчнр тал цергә шишлң керг-үүлдврт орлцач Мукөвүнә Сергей бас ирв. Эмчнр күн болһнд килмҗән тусхаҗ, эмнлһнә туст селвг, эрүл-мендин төрмүдәр цәәлһвр өгв. Эн өдр эмчнрт ирсн улст зүркнә шинҗллт кев, 37 күүкд күн маммографь кев. Хәләврин ашт 9 күүнд ямр нег гем илдкгдв, 9 күн района эмнлһнд эрүл-мендән батрулх болв.
Моһа сарин 6-д Цаһан Нур селәнд көдлсн эмчнрт хам-хоша бәәдг Иҗл, Хошуд болн Җаңһр селәдин әмтн бас бийән үзүлв. Ут тоодан 159 күн эмчнрин хәләврт орв. Селәдин әмтнә дунд олн зүсн гем илдкгдв, 3 күн П.Жемчуевин нертә таңһчин эмнлһнә зүркнә әңгд йовулгдв. Тер мет 16 күн немр шинҗллт кех зөвтә болв. Эмчнр гемтә-шалтгта 4 күүнә гертнь одад, эмнлһнә туст селвгән өгв. «Эрүл-менд бәәтн!» гидг керг-үүлдврин йовудт цергә шишлң керг-үүлдврт орлцачнрт болн теднә өрк-бүлмүдин гешүдт онц оньг тусхагдна. Эн өдр СВО-д орлцачнрин өрк-бүлмүдин 7 элч шинҗллт кеҗ эмчнрлә харһв. Авъяст тохрсар эн керг-үүлдврин йовудт өдгә цага кергсл олзлҗ шинҗллт кенә. Тиигәд, 150 күн ЭКГ-н, 20 күн УЗИ-н болн 73 күүкд күн маммографин шинҗллт кеҗ, эрүл-мендән батруллһна, ямр нег гемәс саглуллһна халхар эмчнрин сүв-селвг авв.
«Эрүл-менд бәәтн!» гидг керг-үүлдвр угтҗ селәдин эмнлһсин көдләчнр бәәрн улсин цусна шинҗллт кеснь туста болв.
Моһа сарин 10-д эмчнр Лаганя района Улан Хол болн Җалһан нертә селәдт одв. Эндр болхла эмчнрин баг Городовиковск района Веселое болн Лазаревское селәдт көдлҗәнә.
БАТАН Наталья