Чинртә хургин ашинь дигләд

17-03-2026, 11:20 | Общество, Таңһчин зәңгс, Хальмг Тањєчин Толєачин ґдр-бўр, Зіњг

Моһа сарин 12-т Ростов-на-Дону балһснд «Негдсн Әрәсә» партин Өмн үзгин дуһргин ик хург болв. Хальмгин делегац Хальмг Таңһчин Толһач Хаска Батун һардвртаһар терүнд бас орлцв. Эн сүүрт ямр төрмүд хаһлгдсна тускар Бату Сергеевич седкүлчнрт цәәлһҗ ашинь диглв.
Энүнә келсәр, давсн керг-үүлдврт сүл тавн җилин эргцд кеҗ-күцәсн тоот ашлгдв. Хамдан көдлҗәдг үүрмүд олн зүсн нәрн төрмүд босхад, иргчин зура батлсн болдг.
– Өргн көдлмшин ашт мана таңһчд йосна болн нег һазра улсин седвәрәр олн төсвс күцәхин төлә цуг таал тогтагдв. Арһлачнрин кергнь сән йовудтаһар күцәгдҗәнә. Тер мет өргн сүүрт орлцад, регионмуд хоорндан дамшлтарн хувалцҗ, кен-негндән сүв-селвгән өгч чадв, – гиҗ Хаска Бату келв.
Ик хургин йовудт Хальмг Таңһчин экономикин делгрлтд онц оньг тусхагдв. Мана таңһчд келн-улсин төсвс болн көтлврмүд күцәгдәд, бәәрн улсин төлә сән таал тогтагдад, делгрлтин ул батлгдсмн. Экономикин халхар ик төсвс күцәх күсл тәвҗәнәвидн, гиҗ таңһчин Толһач цәәлһв.
Хальмг Таңһч селәнә эдл-ахун регион болсн төләдән эн халхиг урдк кевәрн делгрүлх кергтә. Шаңһа малын то ик болад бидн нүүрт йовнавидн. Тер мет селәнә эдл-ахун арһлачнр сән чинртә эд-тавран кеҗ һарһад, орн-нутгин хулд-гүүлгәнә әәмшг уга бәәдл тогталһнд тәвцән орулҗана. Тиим кевәр үүлдврән цааранднь өргҗүлх кергтә, гиҗ Бату Сергеевич темдглв.
Терүнәс нань энергетикин халхд бас оньг тусхагдв. Эн туст региона хазнд ордг олз-ору кемҗәг икдүлх кергтә.
Чинртә төсвс күцәһәд, таңһчд көдлмшч шин ормс бүрдәҗ болхмн. Тер мет хаҗуһас мөңг орулад, экономикин ул батлгдхнь лавта.
– Хальмг Таңһчин хамгин ик зөөрнь әмтн болдг. Мана таңһчд төрскнч седклтә, тевчңгү, дааврта болн дамшлтта улс өдр болһн төрскн һазр-уснаннь делгрлтд тәвцән орулҗ йовна. Тегәд йосна, ниигмин болн партин хамцу үүлдвр ик күцәмҗдтә болхнь маһд уга. Онц темдглхд, цергә шишлң керг-үүлдвр давҗадг һазрт бас диилвр делдҗ, олна кергин болн эвин төлә күчән негдүлхвидн. «Аш бәәнә» нертә ик хург регионмудын һардврин болн шаңһа йосна элчнрин хамцу көдлмшин чинринь дәкн үнлҗ темдглв, – гиҗ Хаска Бату ашлв.

КАРСАНА Евгения

Видео