Делгә Эрднин медальмүдәр ачлгдв

Моһа сарин 27-д таңһчин залврин герт Хальмгин Росгвардин заллтын арвн җилин өөнд нерәдсн байрин хург болв. Хальмг Таңһчин Толһач Хаска Бату, Улсин Хуралын (Парламентин) ахлач Артем Михайлов, залврин ахлач Босхмҗин Гилән, зөв-йос харлһна бүрдәцсин һардачнр, цергллтин ветеранмуд терүнд орлцв.

Хальмгин Росгвардин заллтын һардач, полковник Настинә Нарн нүр үгәр керг-үүлдвриг секв. Энүнә келсәр, 200 һар җилин эргцд ведомствин цергчнр әәмшг уга бәәдл тогталһна халхар үнн-чик седклтәһәр церглҗ йовна.
– Арвн җил хооран Әрәсән Президент Владимир Путинә зәрлгәс иштә урднь МВД-н медлд ордг әңгүдәс мана орн-нутгт Росгвардин заллт бүрдәгдсн болдг. Эндр болхла энүнә ханьд СОБР, ОМОН, ведомственн биш харул болн лицензин зөв өгдг цергллт орна. Өдр-сө уга росгвардейцнр кергән даавртаһар күцәҗәнә. Тер мет Росгвардин элчнр терроризм гетллһнә туст олн зүсн шишлң кергүд бас бүрдәнә, олн бүрдәцсиг харна, – гиҗ темдгләд, Нарн Мазанович хамдан көдлҗәдг үүрмүдән йөрәв.
Керг-үүлдврин йовудт Росгвардин өдр-бүрин тускар белдсн шишлң фильм үзүлв. Терүнд ведомствин әңгүдин һардачнрин болн мергҗлтнрин йөрәлин үгмүд олнд соңсхгдснь темдгтә болв.
– Таңһчин һардвр Росгвардин заллтла өөрхн залһлда бәрҗ, хамцу үүлдврин йовудт олна кергт орлцҗахин тускар келх кергтә. Җил ирвәс кеҗ-күцәсн тоотын кемҗән өсәд йовна. Хамгин түрүнд ветеранмудт ханлтан өргҗәнәв. Тадна үлгүрәр эндрк баһчуд кергитн цаарандан давулҗана. Эндр амр биш цагт росгвардейцнр цергә шишлң керг-үүлдвр давҗадг һазрт одад, диилвр делдхд туслҗана, – гиҗ Бату Сергеевич йөрәлин үгдән темдглв.
Тогтсн авъясар байрин хургин йовудт ончрсн офицермүд болн цергчнр олн зүсн ачлврмудар темдглгдв. Зурһан күн, тедн дунд Росгвардин заллтын һардач, полковник Настинә Нарн Советин Союзин Баатр Делгә Эрднин медаляр ачлгдв (зургт). Тер мет таңһчин Толһачин Ханлтын бичгүдәр, залврин болн Улсин Хуралын (Парламентин) Күндллһнә һашгудар болн ведомствин темдгүдәр кесг улс ачлгдсн болдг.
Байрин хургин йовудт таңһчин сойлын нертә коллективс болн артистнр олна йөрәлин үгд багтад, билг-эрдмәрн байрлулв.

КАРСАНА Евгения