Элстин хамгин сән багшнр йилһгдв

Сегодня, 13:11 | Общество, Таңһчин зәңгс, Зіњг, Сурєуль-эрдм

Җил болһн Хальмг Таңһчин йилһән сән багшиг йилһдг марһан болна. Ода орн-нутгин болн таңһчин һардвр багшнрт һол оньган тусхаҗ, эднә чинринь өөдүлҗ йовна. Ода орн-нутгт медрлтә, билгтә, кергән сәәнәр меддг, өдгә цага некврлә ирлцҗ үүлддг мергҗлтнр кергтә болҗана. Тиим билгтә баһчудыг багшнр сурһҗ, чик сурһмҗ, гүн медрл өгч белднә.
Таңһчин марһа давулхас урд райодын болн Элст балһсна багшнр болн сурһмҗлачнр, баһ наста мергҗлтнр кемҗәнд хоорндан дөрлдҗ хамгин сәәнинь йилһҗ авна. Одахн «Җилин багш - 2026» гидг Цугәрәсән марһана девсң Элстд төгсв.
- Хотл балһсна багшнрин марһан хойр өдртән болв, энүнд дунд сурһульмудас 8 күн орлцв. Эдн кичәлмүдән үзүлҗ көдлмштән сурһулин ямр эв-арһс олзлдган келҗ өгв. Хойрдгч өдрин эргцд тавн багш хоорндан марһлдв. Аштнь Хальмг Келн-улсин гимназин орс келнә багш Һәрән Байрта дииләчин нер зүүв. Элстин 21-ч тойгта сурһулин эклц классин багш Маргарита Пантюхова хойрдгч ормд һарв. 3-ч тойгта дунд сурһулин англь келнә багш Денис Малыков һурвдгч орм эзлв, – гиҗ марһана йовудын тускар Элст балһсна һардврин сурһуль-эрдмин заллтын әңгин һардач Саңһҗин Надежда келв.
Энүнә келсәр, эдн марһана бүрдәһәчнрт ик ханлт өргҗ, марһа давуллһнд сән таал тогтасн Элстин 3-ч тойгта сурһулин һардврин ач-тусинь өөдәнәр үнлв. Тер мет баахн багшнрин марһан болсн 17-ч тойгта сурһулин болн сурһмҗлачнрин дөрлдәнд орлцачнриг тосч авсн 24-ч тойгта бичкдүдин садын көдләчнр эн чинртә керг-үүлдвр өөдән кемҗәнд бүрдәгдхд дөң-нөкд болв гиҗ Надежда Олеговна онц темдглв.
Б.Б.Городовиковин нертә Хальмг ик сурһулин багшнр, КРИПКРО-н мергҗлтнр болн сурһульмудын ачта багшнр жюрин ханьд орв. Багшнр дунд болсн марһана жюриг Элст балһсна һардврин толһачин дарук Дмитрий Довгополов һардв. Түрүн орм эзлсн багш 50 миңһн арслңга мөрәһәр ачлгдв. Хойрдгч болн һурвдгч ормс эзлсн багшнрт болхла 40-30 миңһн арслңга мөрәс бәрүлҗ өггдв. Эн җил марһанд орлцачнр насарн цацу, сурһуль-эрдмин халхд әдл кемҗәнд көдлҗәдг, кергән сәәнәр меддг мергҗлтнр болв. Элстин марһанд нүүрлгч орм эзлсн мергҗлтнр «Багшин эрдмин нуувч» гидг керг-үүлдврт орлцҗ дамшлтарн хувалцна, сурһулин халхар бәрсн күцәмҗин тускар келҗ өгнә.
«Седклән күүкдт тусханав» гидг марһан немр сурһуль-эрдмин багшнр хоорнд болв. Элст балһсна 17-ч тойгта сурһулин элч Валерия Левищева түрүн орм эзлв, С.Радонежскийин нертә РНГ-н немр сурһуль-эрдмин багш Василий Лодянов хойрдгч орм һарв, 15-ч тойгта сурһулин багш Монкила Элвг болн 10-ч тойгта дунд сурһулин элч Юлия Кузыченко һурвдгч орм эзләд йилһрв. Элстин 4-ч тойгта бичкдүдин садын көдләч Ирина Полоусова сурһмҗлачнр дунд түрүн ормд һарв, 16-ч тойгта садын элч Баатрин Александра болн 28-ч тойгта садын сурһмҗлач Чедыра Александра бас дииләчнрин тоод заагдв.
Ирлцңгү марһанд билгтә баһ наста багшнр чигн йилһгдв. Хамдан көдлдг ах үүрмүднь дамшлтарн хувалцад эдниг марһанд белдв. Тиим кевәр чинвртә дөрлдәнә йовудт Элстин техническ лицейин эсвин багш Түрвән Церн түрүн ормд һарч, дииләчин күндтә нер зүүв. 3-ч тойгта дунд сурһулин англь келнә багш Алян Намина хойрдгч орм эзлв, 23-ч тойгта дунд сурһулин эсвин багш Санҗин Санҗ болхла һурвдгчнь болв.
Багшнр болн сурһмҗлачнр өдгә цага төсвән, кичәл давуллһнд олзлдг шин эв-арһан үзүлҗ эрдминнь халхар байн дамшлт хоршасан медүлв. Ода муниципальн девсңд диилвр бәрсн мергҗлтнр таңһчин марһанд орлцхмн. Сән гиснь диилвр бәрҗ, орн-нутгин марһанд таңһчин нер өөдән бәрҗ диилвр бәрхиг эднд дурдҗанавидн.
ТҮРВӘН Һуна

Видео