Дуука Куука хойр үүрмүдән байрлулв

Арвн тавн җил хооран хальмг келндән хару, төрскнч седклтә, билгтә Шорван Феликс Һәрән Лиҗ хойр хальмг ээҗнрин дүр тогтаһад, эн җилмүдин эргцд билг-эрдмәрн олн хәләһәчнриг байрлулҗ йовна. Дуука Куука хойр хальмг ээҗин бәәдл-җирһл үзүлҗ, келн-улсин амн үгин зөөрлә таньлдулҗ олн әмтнә седкл авлсн болдг. Келхд, эднә концерт болхин туск зәңг дарунь ик холд тарад, сул орм үлдсн уга.

Дуука ээҗ болҗ Шорвин Феликс наадна, Һәрән Лиҗ болхла Куука болна. Баһчудын келсәр, эдн 2011 җилд «Иткл» гидг олна бүрдәцин ханьд түрүн болҗ таңһчин хол селәдәр йовҗ, билг-эрдмән үзүлдг бәәсмн. Эн олна бүрдәцд хальмг келтә, седвәртә, төрскнч седклтә баһчуд ордг бәәсмн, тегәд төрскн келән хадһллһн эднә һол күслнь билә. Тер концертст Шорвин Феликс болн Һәрән Лиҗ түрүн болҗ Дуука Куука хойрин дүр үзүлсн мөн. Әмтн эднә билгинь үнлҗ, байртаһар тосдг болв.
Нег-негән олн җилдән таньҗ-меддг хойр ээҗ хоорндан олн зүсн төрәр күүндәд, баһ цаган тодлад, һашута болн инәдтә йовдлмуд сергәҗ, шоглад-наадлад олна седкл авлна. Олн-әмтн дуран өгсн Дуука Куука хойр концерт болһндан Сиврин җилмүдиг тодлна, тер һазра улсин шогта дуд дуулна. Нәр-нааднд цуглрсн улс эн кемд ээҗнрән тодлҗ, тууврин җилмүдин туск теднә тодлврмудыг бас сергәдг болх чигн биз. Дуука Куука хойр кен-негнднь өөрхн улс болҗ хоорндан хальмгар күүндҗәһәд, орс үгмүд чигн орулад, өдгә цага бәәдл-җирһлд учрсн инәдтә йовдлмуд сергәһәд олн-әмтиг көштлнь инәлһҗ шоглна. Хойр ээҗ эндрк өдрин нәрн төрмүд босхна, баһчудын бәәдл-җирһлин, баһ үйнр төрскн келән мартҗахин, эмчд одсна тускар чигн шогта наад үзүлнә. Эдн хальмг улсин амн үгин зөөриг эвтә кевәр олзлҗ, үлгүрмүд, йөрәлмүд, дуд орулҗ күн болһна чикнә хуҗр хаңһана.
Дуука Куука хойрин концертд генткн Амрхн ээҗән болн терүнлә үүрлдг бәәсн нег медәтиг үзсн болад зөвәр үүмәд одлав. Дуука ээҗин келсәр, эднә негнь бас «махта-шөлтә» бәәсмн. Бичкндән зуни амрлһндан совхозин фермд ээҗдән гиичлдг биләв. Хойр ээҗ нег-негндән золһад, хальмг цәәһән ууһад, дууһан чигн дуулад сул цаган сергмҗтәһәр давулдг бәәсинь ода чигн тодлнав.
Хальмг улсин артистнр Мукөвүнә Кутлан болн Бадмхаалһин Александр, нертә дууч Брюгидикә Айса, «Эрдм» ансамблин, «Олимп» студин билгтнр Дуука Куука хойриг дөңнәд, эднә концертд бас орлцв. Иигәрән ирсн медәтнрт хальмг авъясар әмтәхн белг нерәдснь темдгтә болв.
САРҢГА Амрхн