Медрлинь гүүдүлх күслтәһәр

Сегодня, 13:35 | Общество, Таңһчин зәңгс, Зіњг, Сурєуль-эрдм

Баһчуд дунд төрскн кел тархалһна керг ик чинр зүүҗәнә. Хальмг ик сурһульд болдг хальмг келнә Цугәрәсән олимпиад энүнд туслҗахнь лавта. Одахн, лу сарин чилгчәр, терүнә ашлгч девсңгнь болв.
Марһанд орлцхин төлә таңһчин цуг сурһульмудын 8-11-ч классмудын 400 һар сурһульч холас даалһвран күцәҗ медрлән үзүлв. Теднәс Хальмг Таңһчин болн Әәдрхнә мүҗин 200 һар сурһульч ашлгч марһанд орлцх күндтә зөв авв.
Хальмг келнә, монһл үндстә кел шинҗллһнә, хальмг утх-зокъялын болн седкүлчнрин эрдмин тиңкмин көдләчнр жюрин ахлачнрин болн комиссин гешүдин тоод орв. Җил ирвәс орн-нутгин олимпиадт орлцдг сурһульчнрин то өсәд йовна гиҗ эдн темдглв. Тегәд арвтнрин төлә төрскн келн болн сойл соньмслт үүдәҗәхиг тер йовдл иткүлҗәнә. Эн җил олимпиадын көтлврт төрскн келнәс нань орс келн чигн орв. Дарук җилд болхла орс утх-зокъял орулгдхмн гиҗ зуралгдҗана.
Хальмг ик сурһулин хальмг болн дорд үзгин кел шинҗллһнә күрәлңгин һардач Лиҗин Мингиян Әрәсән марһа бүрдәлһнә туск тоолврарн хувалцв. «Сурһульчнр болн теднә эк-эцкнр эн марһанд орлцхар седнә. Багшнрнь гүн медрл өгч эн марһанд дигтә-даратаһар белднә. Тиим марһаг мана ик сурһуль яһад бүрдәҗәнә гихлә, бидн хальмг келнә делгрлтиг түргдүлхәр седҗәнәвидн, баһчуд, сурһульчнр төрскн келән сәәнәр медтхә гисн күсл тәвҗәнәвидн.
Тер мет хальмг келнә багшнр сурһульчнрин белдвриг өөдлүлҗ, теднд гүн медрл өгтхә гисн неквр бәәнә. Мана ик сурһулин улд болҗадг Цугәрәсән олимпиадын даалһвриг мана багшнр белднә, җил болһн тернь шинрүлгднә, тиим кевәр бидн чигн баһ биш көдлмш күцәнәвидн.
Мана тоолврар, англь болн нань чигн талдан һазадын кел орулҗ марһа бүрдәц болҗана. Болв терүнә төлә жюрин гешүдин онц белдвр кергтә болх, яһад гихлә орн-нутгин марһана төлә даалһврин арвн һар янз белдх кергтә», - гиҗ Мингиян Алексеевич цәәлһв.
16 сурһульч марһана ашлгч девсңд күрв, тер тоод дөрвн күн Келн-улсин гимназяс, хойр күн Троицкое селәнә гимназяс, һурвн сурһульч Элстин 10-ч тойгта дунд сурһуляс болв. Элстин олн халхин гимназяс, 12-ч, 17-ч, 20-ч болн 21-ч тойгта сурһульмудас, Лаганя, Ачнр селәнәс неҗәһәд сурһульч Цугәрәсән марһанд бас орлцх зөв авв. Эдн 8-11-ч классмудт сурна, тегәд кесгнь дарук олимпиадт орлцҗ улм өөдән күцәмҗ бәрҗ чадҗана. Эднәс 7 күн сән медрл үзүләд, нүүрләчнрин тоод орв.
Тиим кевәр хальмг келнә Цугәрәсән марһа бүрдәдг Хальмг ик сурһулин күрәлңгин һардачин болн багшнрин седвәр хальмг кел хадһллһна болн делгрүллһнә кергт туслҗана гиҗ лавтаһар келҗ, теднә төрскнч седклинь эрк биш дөңнх кергтә.
Хальмг ик сурһульд орлһна кемд олимпиадын дииләчнр онц зөв эдлнә. Тиигәд, кел даслһна салврт орхла эднд 100 балл өггдх. Тиим кевәр төрскн келән болн утх-зокъялан улм гүүнәр дасх сурһульчнрин то өсәд йовна. Таңһчин һоллгч вузд эдн хальмг келнлә дегц китд кел дасна. Тер мет моңһл болн корей келнә талдан хойр мергҗл бәәнә, болв терүнлә дегц оютнр эрк биш хальмг келән дасх зөвтә.
Хальмг келнә багшнрин көдлмшин таал ясрулхин төлә кесг керг күцәгднә. Ода сурһульд ирҗәдг баһ наста багшнрин җалвнь өөдлҗәнә, тер демин кемҗән цааранднь чигн өсәд бәәх. Райодын болн Элст балһсна һардвр баһ наста мергҗлтнрт көдлмшин болн бәәдл-җирһлин сән таал тогтах зөвтә гисн даалһвр эднд өггдҗәнә. Таңһчин залвр эн төрмүдт һол оньган өгәд бәәх гиҗ хальмг кел даслһна төрмүдт нерәдсн шишлң селвлцәнд онц заагдсмн.
Хальмг ик сурһулин номтнр болн багшнр эн төрмүдт бас ик оньган тусхана. Элстин 21-ч тойгта сурһульд хальмг кел болн дорд үзгин кел шинҗллһнә күрәлңгин һардач Лиҗин Мингиян хальмг келнә 40 һар багшла харһҗ күүндв. Хальмг келнә багшин эрдмиг сурһульчнр шүүҗ автха, терүнә төлә эдниг соньмсулҗ белдврин ик көдлмш кех кергтә гиҗ харһлтын йовудт келгдв. Сурһульмудын, райодын даалһврар арвтнр Хальмг ик сурһульд орҗ чадҗана, хөөннь хәрү райондан ирҗ көдлх зөвтә.
Хальмг ик сурһульд төрскн кел, һазадын нань чигн кел даслһна таал бәәнә, һазадын орнд чигн дамшлт хоршаҗ номтын керг чигн шүүҗ авч, хальмг келәр һардг һарцст чигн көдлҗ болҗана. Тер тоотыг багшнр дөңнҗ, сурһульчнртан хальмг вузин тускар улм тодрхаһар келҗ өгх санаһан медүлв. Тиим кевәр Хальмг ик сурһулин болн багшнрин хоорндк залһлдан батрад йовна.

ТҮРВӘН Һуна

Видео