Энткгин сойлын Өдрмүд болхмн

Сегодня, 13:39 | Общество, Таңһчин зәңгс, Зіњг, Сойл

Нидн намрар Элстд бүрдәгдсн шар шаҗна нарт-делкән III ик хургт һучн һар орн-нутгин элчнр ирҗ орлцсн билә. Терүнә йовудт мана таңһчин һардвр кесг нутгла цаарандан нөкцлтхәр үгцсн мөн. Эн җилин хөн сард Элстд Энткг орн-нутгин сойлын Өдрмүд болхмн. Энүнә тускар шидр «Калмыкия» РИА-н барин төвд селкүлчнрлә болсн харһлтд келгдв.
Хальмг Таңһчин сойлын болн зуульчллһна министр Бембин Евгений, Хазн балһснд Энткгин элч Джейсундхар болн элч Гитика терүнд орлцв.
Өдгә цагт эн чинртә керг-үүлдвр давулхин төлә белдврин көдлмш күцәгдҗәнә. Бембин Евгенийин келсәр, хөн сарин 10-ас авн 12 күртл Энткгин сойлын Өдрмүд Элстд давулгдхмн. Энүнә йовудт мана таңһчин улс Энткгин сойлла, авг-бәрцлә, эн келн-улсин хотын өвәрцлә, хувц-хунрла болн талдан олн тоотла таньлдҗ чадхмн.
– Сүл җилмүдин эргцд ирлцңгү керг-үүлдвр зуг Москвад бүрдәгдсн билә. Ода орн-нутгин хотл балһсна дару тана таңһчд эн керг давулгдхнь темдгтә гиҗ санҗанав. Сойлын Өдрмүд кесг талвңд бүрдәгдхинь шинҗлҗ хәләввидн. Цугнь маднд таасгдв, – гиҗ Джейсундхар темдглв.
Тер мет чинртә керг-үүлдврин йовудт Элстин кинотеатрмудт олнд тааста энткгин кинофильмс үзүлхмн. Терүнәс нань эн һазра бииһин болн дууна коллективс ирҗ билг-эрдмәрн байрлулх. Номтнр, олна үүлдәчнр болхла Хальмг ик сурһульд болх номин хургт орлцхмн. Йога кергин эрдмчнр бас ирхмн гиҗ күләгдҗәнә.
КАРСАНА Евгения

Видео