«Медрл» ниицәнә әңгин үүлдвриг өөдәнәр үнлв

Шидр Хальмг Таңһчин Толһач Хаска Батун һардврт «Медрл» Әрәсән ниицәнә таңһчд үүлддг әңгин бүртклһнә хүүвин сүүр болв. Олна ниицәнә Әрәсән Өмн үзгин регионмудт делгрлтин заллтын һардач Александр Шматько, Хальмг Таңһчин Улсин Хуралын (Парламентин) Ахлач Артем Михайлов, таңһчин залврин Ахлач Босхмҗин Гилән, таңһчин Толһачин һардврин ахлач Кирилл Попов, «Медрл» ниицәнә таңһчд үүлддг әңгин ахлач, Б.Б.Городовиковин нертә Хальмг ик сурһулин һардач Салан Бадм, бүртклһнә хүүвин гешүд эн сүүрт орлцв. Тер мет «Медрл» Әрәсән ниицәнә һардачин дарук Георгий Будный ниигмин сүлҗәнә эв-арһар залһлда бәрҗ, сүүрт хәләгдсн төрәр ухан-тоолврарн хувалцв.
«Медрл» Әрәсән ниицәнә таңһчд үүлддг әңгин һардач Манҗин Элеонора давсн җилд күцәсн көдлмшин аш дигләд, эн җил кех-күцәх тоотын тускар келв. Гегәрлтин, төрскнч сурһмҗин керг-үүлдврмүдт сурһульчнрас, оютнрас, шаңһа бүрдәцсин көдләчнрәс нань ах үйин улс болн сурһульчнрин эк-эцкнр бас шунмһаһар орлцҗахиг Элеонора Сангаджиевна темдглв. Давсн җилд олна ниицәнә кергүдт орлцсн улсин то кесг холванд өсв, чинртә төрмүдәр харһлтс, «төгрг ширән» сүүрмүд болв, тегәд таңһчин әңг күцәмҗтә үүлдврин ашт Әрәсәд 44-ч орм эзлв. Региона әңгин бүртклһнә хүүвин гешүд шунмһа лектормуд болҗ, бичкдүдлә болн баһчудла болдг харһлтст орлцна. Давсн җилд эднәс 8 күн Әрәсән ниицәнә һардврин Күндллһнә һашгар ачлгдв, Довгопола Дмитрий «Медрл» Әрәсән ниицәнә лектормудын марһанд ончрв, Манҗин Элеонора ЮФО-д «Голос регионов» болн Учура Елена «Медрл.Мөрә» мөрәсәр ачлгдв. Әрәсән 2713 лектормуд дунд Хальмгин 10 элч сән гисн лектормудын тоод орснь бас темдгтә. Көглтин Даван нертә 17-ч тойгта дунд сурһулин эк-эцкнрин ниицән хаалһд әәмшг уга бәәдл тетклһнә төсв белдәд, 500 миңһн арслңга мөрә шүүҗ авв. Ода Лаганя, Приютна болн Городовиковск райодт бәәрн әңгүд үүлдҗәнә, болв эн җил талдан райодт чигн көдлмшән шунмһадулх күсл тәвгдҗәнә гиҗ Манҗин Элеонора зәңглв.
Хаска Бату әңгин үүлдвриг өөдәнәр үнлҗ, райодын толһачнр бәәрн әңгүд бүрдәлһнд дөң-нөкд болх зөвтә гиҗ темдглв. Тер мет сурһульчнрин эк-эцкнрин ниицәсин үүлдвриг шунмһадулҗ, шаңһа мөрә шүүҗ авч, олн зүсн халхар седвәр татҗ төсвс күцәх кергтә гив. «Бидн хамдан үүлдҗ, нег-негндән дөң болҗ улм сән күцәмҗ бәрх зөвтәвидн», - гиҗ Бату Сергеевич ухан-тоолврарн хувалцв.
«Медрл» Әрәсән ниицәнә һардачин дарук Георгий Будный таңһчд үүлддг әңгин үүлдвриг бас темдглҗ, эк-эцкнрин седвәр дөңнлһнә көтлврт ут тоодан 1 җува арслң йилһгднә, нег төсв күцәлһнә кергт нам 2 сай арслң күртл шүүҗ авч болхмн гиҗ келв. Өөрхн иргчдән эн көтлвриг шишлң сурһулин бүрдәцс дунд бас тархах күсл бәәнә. Дунд сурһульмудт умшачнрин негдлт бүрдәлһнә тускар чигн эн келв, энүнд нертә артистнр, билг-эрдмин үүлдәчнр орлцхмн гив. Хальмг Таңһчин сурһуль-эрдмин болн сойлын бүрдәц болһнд неҗәһәд болв чигн лектор үүлдхлә сән болхмн гиҗ Георгий Будный сүв-селвг орулсиг сүүрт орлцачнр дөңнв. «Медрл» Әрәсән ниицән гегәрлтин, орн-нутгин чинртә йовдлмудын туск соңсхврмуд белдв, тегәд дамшлтарн хувалцҗ чадх гиҗ Георгий Вячеславович келв.
Хальмг ик сурһулин һардач Салан Бадм таңһчин әңгин үүлдвриг үнлҗ, көдлмшин аш күцәмҗтә болсиг темдглснд ханлтан өргәд, Хальмгин лектормуд меҗә һатц талдан регионмудт чигн керг-үүлдврмүд давулна гиҗ бахтв. Тиигәд, Хальмг ик сурһулин номт Һәрән Мергн Херсонск мүҗд харһлтс давулв. Хальмг ик сурһулин 27 оютн бас олна ниицәнә үүлдврт шунмһаһар орлцҗ, бичкдүдт болн баһчудт лекцс умшҗ, соньн керг-үүлдврмүд давулҗана. Бадм Катинович эн җил сурһуль-эрдмин болн сойлын бүрдәцст, райодт лектормудын үүлдвриг шунмһадулх болҗ үгән өгв.
Олна ниицәнә Әрәсән Өмн үзгин регионмудт делгрлтин заллтын һардач Александр Шматько Хальмг әңгин үүлдвриг темдглҗ, нидн аһу ик көдлмш күцәгдсиг онц заав. 2025 җилин ашар Хальмг Таңһч 44-ч орм эзлсн болхла, эн җилин түрүн һурвн сарин ашар 39-ч ормд һарв гиҗ күндтә гиич бахтв. Таңһчин һардвр олна ниицәнә әңгин үүлдвриг дөңнҗ, хамдан нөкцҗ көдлҗәхинь күцәмҗтә болв гиҗ келәд, «Литературная гостиная» гидг төсв күцәлһнд нөкд болхиг сурв. Советин цагт мана орн-нутгт өрк-бүл болһн дегтр умшхдан дурта бәәсмн, тегәд тер авъясиг сергәҗ сурһуль-эрдмин, сойлын бүрдәцст ирлцңгү төсв күцәх кергтә.
Сүүрин чилгчәр «Медрл» Әрәсән ниицәнә таңһчд үүлддг әңгин лектормудыг Хальмг Таңһчин Толһачин, таңһчин Улсин Хуралын болн залврин Ханлтын бичгүдәр ачлв.

ДООҖАН Наталья