Бурятин «Ульгэр» театрин наадд

Сегодня, 13:16 | Общество, Таңһчин зәңгс, Зіњг, Сойл

«Ик гастрольмуд» гидг орн-нутгин төсвин кемҗәнд Хальмгт Бурятин наадһасин театр гастрольд ирв. Ах-дү республикәс ирсн театр Элстд «Җаңһр» наадһасин театрин тәәз деер нааддан үзүлҗәнә. «Ульгэр» нертә театр Бурятьд бәәтхә цуг Әрәсән кемҗәнд темдгтә үүдәгч коллектив болҗана. Байн тууҗта театр билг-эрдмәрн нер һарсмн. Театрин хамгин өөдән мөрәһәр дөрвн дәкҗ ачлгдсмн. Ода Хальмгин хәләһәчнр эднә нааддыг хәләҗәнә.

Мөрн сарин 7-ас авн бурят артистнр нааддан экләд үзүлв. Түрүн хәләһәчнрнь эклц классмудын сурһульчнр болв. «Дочь Байкала – Ангара» гидг олн дунд ик тааслт олсн мюзикл-наадан гиичнр үзүлсмн. Театрин художественн һардач эн наадн бичкдүдт таасгдх угай гиҗ зовҗала. Күүкд-көвүд наадыг оньган өгч хәләснь байр үүдәв. Гастролин йовудт бурят артистнр «Свет мой, зеркальце! Скажи!» болн «Как птичка упала с неба» гидг наадд үзүлҗәнә.
Хаврин сәәхн кемлә бамб цецгин наадм болҗадг цагла Хальмгт ирсндән гиичнр байрлҗана. «Җаңһр» театрин артистнр эдниг бүләнәр тосч авснд седкл байрар дүүрсинь медүлв.
Мөрн сарин 7-д хальмг болн бурят театрмудын һардачнр барин көдләчнрлә харһв. Хальмг Таңһчин сойлын болн зуульчллһна министерствин нерн деерәс Бурятин артистнриг әңгин һардачин дарук Гадана Наталья йөрәв.
«Ульгэр» театрин художественн һардач Эрдэни Джалцановин келсәр, эднә артистнр Хальмгт һурвдад ирҗәнә. Ахнр-дүүнрин һазрт ирсндән седкл байсад бәәхин тускар эн келв. Эн гастрольмуд маднд онц кевәр тодлгдх. Хаврин тег үзҗ, бамб цецгин наадмин йовудт билг-эрдмән үзүлснь энтн мартгдшго йовдл гив.
Аһшас Элстүр күртлән мана келн-улсин хоорндк залһлдана тускар күүндәд йовсна тускар «Ульгэр» театрин һардач Баирма Дашидоржиева келв. Театр эврә артистнрән белдлһнә дамшлтарн хувалцв. Эдн кесг җилин туршарт Бурятин Толһачин дөңгәр шишлң төсв күцәһәд, йисдгч классмудын сурһульчнрас билгтә арвтнриг шүүҗ авад, ах сурһульд ортлнь килмҗән тусхаһад, театрин үүлдврлә таньлдулад дасхдгнь цугтад йир соньн болв. Эднә театрин гер ода ясгдҗахин тускар гиичнр келв. Хальмг артистнр һаха сард Бурятьд ирхлә, үүрмүдән тосч, цуг тоотынь үзүлхвидн, гиҗ Баирма үгән товчлв.
«Җаңһр» театрин һардач Кемя Бередина Хальмгин наадһасин театр һаха сард Бурятьд күрәд, нааддан үзүлхин тускар келәд, «Ик гастрольмуд» гидг орн-нутгин төсвин нилчәр талдан һазрт нааддан үзүлх таал учрҗахиг темдглв. Бурятин театрин байн дамшлтла таньлдҗахнь нег үлү ик чинртә болҗахинь хальмг театрин һардач онц заав.
Бурятяс ирсн артистнр Келн-улсин музейд одв, хотл балһсар болсн экскурьст орлцв. Басңга Баатрин нертә Келн-улсин театрт «Эңкр манахс» гидг наад эдн хәләв. «МахнФест» нәәрт бас орлцв.

ХӨӨЧИН Галина

Видео