«Зуульчллһн» соньн болв

Эн җилин намрар бичкдүдин үүдәлтин Бәәшң 35 җилин өөнән темдглхмн. Терүг угтҗ бүрдәцин улд үүлддг билг-эрдмин багмудын бичкдүд «Зуульчллһн» гидг концерт белдв.

«Акварель» болн «Илвтә мастерской» студьсин күүкд-көвүдин зургудын болн кегдлмүдин һәәхүл концертд ирсн гиичнрин оньгт тусхагдв. Хальмгин хәәврин ниицәнә һардач Халхинә Дмитрий бичкдүдлә шаһа наадад, олн зүсн даалһвр күцәв. Келхд, кесгнь өрк-бүләрн аав-ээҗнрән болн эк-эцкнрән дахад эн концертд ирснь үзгдв.
Энүнә эклцәр нег көвүн «Иньгллт» паркд сәәхн күүкиг үзәд, терүг хәәһәд, дәкәд нег харһхин тускар ухалҗ зүүдндән зуульчлсна тускар келгдв. ДДТ-н улд үүлддг «Образ» театральн студин гешүд, «Седкл», «Айтин», «Магия танца» болн «Алтн» бииһин ансамбльмудт орлцачнр, уйн наста домбрчнр эн концертд билг-эрдмән үзүлв. Энд өдгә цага эв-арһс олзлгдҗ, хальмг сәәхн тег, гөрәсд, бадм болн бамб цецгүд үзүлгдв. Эн көвүн таасгдсн күүкнлә харһх угаһинь намртан өөнин байрин концертд медгдәд бәәхмн.
Бичкдүдин үүдәлтин бәәшңгин һардач Ефрема Чингис болн Элст балһсна толһачин дарук Довгопола Дмитрий билгтә бичкдүдт болн эднә эк-эцкнрт ик ханлтан өргв. «Эн өдрәс авн бидн мана өөнин зуульчллһ эклҗәнәвидн», - гиҗ бүрдәцин һардач келәд, эннь эрк биш соньн, үзмҗтә нәр-наадн болхинь иткүлв.
Мана зәңгч