Бурхн Багшин ик көшә Элстд босхгдх

Эн җилин хөн сард Хальмгт Энткгин сойлын Өдрмүд болх гиҗ урднь зәңглсн биләвидн. Сойлын өвәрц ик көтлврәрн эн Өдрмүд таңһчин әмтнд тодлгдх гиҗ күләгдҗәнә. Ода таңһчд Энткгин Деед консульствин көдләчнр ирсн бәәнә.
Хальмгин Шаҗн Лам гевш Тензин Чойдакла эн делегацин гешүд харһв.
Сойлын залһлдана халхар ик чинртә эн керг-үүлдврт белдлһнә һол төрмүдәр зерг Джейсундхар Девапрасадла тохнята күүндвр болв.
Хальмгин Шаҗн Лам гиичнрт күндллһән медүләд, давсн җилд Хальмгт Бурхн Багшин әрүн тоотыг Энткгәс авч ирҗ әмтнд ик байр үүдәсиг ханлттаһар тодлв. Ода Хальмгин әмтн ухан-серлдән герл орулсн мет бәәхин тускар Тензин Чойдак келв.
Энткгин консул Хальмгт болх сойлын Өдрмүд ямаран кевәр бүрдәгдхин тускар тодрхаһар келҗ өгв. Хальмгин әмтн энткгин кино хәләх, үүдәгч коллективсин концертст орлцҗ, байн тууҗта орн-нутгин сойлла таньлдх арһта болҗана. Урн һарин эрдмчнрин кесн тоотыг хәләсн деерән таасгдсн кегдлиг хулдҗ авч болх таал чигн учрҗана.
Консулын келсәр, Бурхн Багшин ик дүр элснәс кевлҗ кех нертә эрдмч Элстд ирн гиҗәнә. Өндртән тавн метр болх Бурхн Багшин ик көшә углҗ тәвх бәәрн хәәгдҗәнә.
Хальмгин Шаҗн Лам Тензин Чойдак Энткгин сойлын Өдрмүд бүрдәлһнд болн давуллһнд орлцх седклән гиичнрт медүлв. Ик чинртә эн керг-үүлдврмүд Энткгин болн Хальмгин әмтнә оюни болн сойлын залһлданд цуг халхасн туслх гисн ицлтә бәәхән гевш Тензин Чойдак медүлв.

УШКАНА Сувсн