Диилвр бәрсн багшнриг ачлв

Сегодня, 15:47 | Общество, Таңһчин зәңгс, Зіњг, Сурєуль-эрдм

Шидр Элстд «2026 җилин багш» марһана ашинь диглв. Эн җил марһан һучн тавдгч кемдән давулгдв. Хальмг Таңһчин Улсин Хуралын (Парламентин) Ахлач Артем Михайлов, залврин ахлачин дарук – то-дигин делгрлтин министр Этән Алексей, сурһуль-эрдмин болн номин министр Александр Ким, Б.Б.Городовиковин нертә Хальмг ик сурһулин һардачин дарук Натра Баира, сурһуль-эрдмин профсоюзин таңһчин бүрдәцин ахлач Эдән Цаһан керг-үүлдрт орлцв.
Темдглхд, эн җилин марһана жюрин ханьд «2025-ч җилин багш» Цугәрәсән марһана дииләчнр Юрий Уробушкин болн Анастасия Пономаренко орлцснь темдгтә болв.
Хойр өдртән болсн марһан «Иньгллтд мана күчн» гидг дуудвртаһар давулгдв. Ил кичәлмүдин йовудт багшнр көдлмштән өдгә цагин эв-арһсиг яһҗ олзлдган үзүлв. Хальмг Таңһчин райодын дунд сурһульмудын элчнр эврә багшнран дөңнхәр ирв.
– Марһана тууҗиг сергәхлә җил ирвәс сурһуль-эрдмин халх оңдарад йовна. Тер мет мана таңһчд дунд сурһульмуд ясгдад, дорас өсч йовдг үйнрин төлә сән таал тогтагдҗана. Хальмгин залвр эн көдлмшиг цаарандан күцәҗәнә, эн җил болхла кесг сурһульмудт болн бичкдүдин садмудт бат ясвр кегдҗәнә, – гиҗ Этән Алексей темдглв.
Улсин Хуралын (Парламентин) Ахлач Артем Михайловин келсәр, бийнь дунд сурһулин һардачар кесг җилдән көдлсндән бичкдүдт гүн медрл өгнә гисиг сәәнәр меднә. Арвн нәәмн җил хооран эврән иим марһанд орлцсан тодлв. Эндр болхла багшнрин болн сурһульчнрин төлә сән таал тогтагдсн бәәнә. Тегәд цугинь олзлад, кергән цаарандан даавртаһар күцәҗ йовхиг эн дурдв.
Марһана ашар дииләчнрин нерд заагдв. Кичгә Төлән нертә Хальмг келн-улсин гимназин орс келнә болн утх-зокъялын багш Һәрән Байрта (зургт) 2026 җилин багш болв. Удл уга Байрта Сангаджиевна Липецк балһснд болх Цугәрәсән марһанд мана таңһчиг элчлх болв.
Яшалта селәнә «Байр» бичкдүдин садын көгҗмин багш Мучерян Татьяна 2026 җилин сурһмҗлач болв. Тер мет Фазыла Саглр, Анна Осса, Ирина Степанова, Елена Павлова эврә әңгүдин марһаст бас ончрсн болдг.
Марһана дииләчнр 100000 арслңга сертификатмудар ачлгдв. Хойрдгч болн һурвдгч ормс эзлсн улст 70 болн 50 миңһн арслңга сертификатмуд бәрүлҗ өггдв.
Хальмгин улсин артистк Очкан Анна, «Веснушки» болн «Жемчужина» ансамбльмудт орлцачнр бас багшнриг болн сурһмҗлачнриг йөрәв.

ОЛЬДАН Цаһан

Видео