Тоомсрта эмчин нерн мартгдшго

Сегодня, 11:23 | Общество, Таңһчин зәңгс, Зіњг, Санл

Москва балһсна бичкдүдин нег поликлиникд көдлмшин өдр төгсч йовла. Бичкдүдин эмчәр көдлҗәсн Санҗин Валентина гемтсн көвүд-күүкдт золһхар гер талнь һарч йовхар белдҗәлә. Тиигҗәтл генткн нег күн цокад орҗ ирнә. – Валентина Нарановна, та энд көдлнәт? Мана әңгин эмчәр көдлсиг соңсад ирләв, – гиҗ баахн бер орҗ йовад сурв.
Урднь эн күүкн Целинн района Троицкое селәнд бәәсмн. Үрән дахулад ирсн берлә күүндәд, бичкнднь энүнә хәләврт бәәсиг эмч тодлв. Тер цагас кедү җил давсн бийнь бер эмчән мартсн уга болҗ һарв. Москвад бәәһәд, үрнь нег һазра дамшлтта, эмчин хәләврт бәәхинь медәд күүкд күн байрлв. Эн йовдлын тускар Санҗин Валентина өөрхн улстан келҗ өгсн бәәҗ.
Валентина Нарановна дөчн һар җилин туршт кедү бичкнә әм аврсн болх гинәт… Яшкуль селәнд бәәдг Төрскән харсгч Алдр дәәнд орлцач Нарн Кашаевич болн Һучн Горяевна Лиджиевихнә олн үртә өрк-бүлд эн өсч-босв. Экнь эрт сәәһән хәәһәд, арвн дөрвтә Валя дүүнрән хәләдг болв. Герин цуг көдлмшиг эн күцәдмн. Мел тер цагт эк угаһар яһҗ өсдгинь медәд, иргчдән бичкдүдин эмч болхар шиидсн болдг.
Өсәд-босад Валентина дунд сурһулян төгсәснә хөөн Сарпуль балһсна эмчин ик сурһульд орҗ сурв. Көтчнрә района эмнлһнд күч-көлснә хаалһан эклхд Санҗин Валентина нилх көвүтә бәәсмн. Герин эзн Виктор авалян цуг халхар дөңнәд, дарунь баахн өрк-бүл Троицкое селәнүр нүүҗ ирв. Тенд Валентина Нарановна бичкдүдиг эмндг района цергллтиг һардв. Амр биш көдлмшиг эн чадмгар бүрдәҗ чадв.
Тер җилмүдт сәәһән хәәсн гемтә нилхдин то икдәд йовла. Өдр болһн поликлиникд бичкн болһнд оньган тусхаҗ, эк-эцкнриг соньмсулҗадг төрмүдәр тодрха цәәлһвр өгдг бәәсмн. Тер мет сөөһәр чигн эмнлһнд көдләд, дамшлт хоршаһад, ирлцңгү өвәрц тоотын тускар медҗ авв. Баахн мергҗлтнрт бас нөкд болҗ, көдлмшән яһҗ күцәхинь заадмн. Зәрмдән гемтә бичкдүдин үүмҗәсн экнрт чигн сүв-селвгән өгәд, төвкнүлдг бәәҗ. Эмнлһнә чик керг-үүлдврмүд бүрдәсн ашт сәәһән хәәсн бичкдүдин то баһрв. Эн йовдл эмчнрт эрк биш омг болн урмд өгв.
Һундхас, җил хооран Санҗин Валентина сәәһән хәәв. Эн һашута йовдл учрв гиҗ өөрхн элгн-саднь, ханлтта эк-эцкнр чигн ода күртл иткҗәхш. Хальмг Таңһчд, Москвад чигн ик дамшлтта, цаһан седклтә, тевчңгү эмчиг ода күртл мартлго тодлад бәәхнь лавта. Дурта авалиннь, һанцхн көвүнәннь, бичкн ач күүкнәннь болн цуг элгн-саднаннь төлә Валентина хамгин эңкр, хәәртә күн бәәсмн. Олн дундан тоомсрта, күндтә күн сәәһән хәәхлә, нернь мартгддго гиҗ тоолгддг. Таңһчин болн орн-нутгин эрүл-менд харлһна халхд Санҗин Валентинан күргсн ач-туснь баһ биш, эмнүлгдсн бичкдүдин болн теднә эк-эцкнрин санлд нернь мөңкрх гиҗ сангдна…
Санджиевихнә болн Лиджиевихнә өрк-бүлмүд

Видео