Соньн төсв күцәгдв

Мөрн сарин 21-д Манҗин Аркадин нертә Хальмг филармоньд «Духовная аристократия степи» гидг соньн нәр олна оньгт тусхагдсн билә. Энүнә тускар тодрхаһар седкүлчнрлә болсн харһлтд Хальмгин билг-эрдмин ачта үүлдәч Татьяна Милованова болн Әәдрхнә музей-заповедникин һардачин дарук, тууҗ номин доктор, буддолог-номт Андрей Курапов келҗ өгв.
Эн тууҗин гүн учр-утхта төсв болна. Урднь Татьяна Милованован бүрдәсн «Хальмг тег» зургудын төсвин ханьд эн орв. Ирлцңгү һәәхүл Әәдрхнә музейд бүрдәгдәд, олна хәләһәчнрин оньг авлсн билә.
Элстд болсн харһлтд олн-әмтн орлцв, тедн дунд номтнр, олна үүлдәчнр ирв. Тууҗин кесг йовдлла ирлцҗ Татьяна Алексеевна һарддг театрин күүкд келн-улсин ке-сәәхн хувц үзүлв. Тер мет таңһчин нертә артистнр улсин дуд дуулад, олыг байрлулв.
– Тууҗин чинртә төсвд орлцсндан байрта бәәнәв. Хам-хоша бәәдг мана регионмуд кезәнәс авн хоорндан ниитәһәр бәәхнь сән йовдл мөн. Улсин ниицлтин җилд иим төсв күцәгдснь темдгтә болв, – гиҗ Андрей Курапов ухан-тоолврарн хувалцв.
Ирх 2027 җилд Әәдрхнә музей-заповедник 190 җилин өөнән темдглхмн. Байрт орлцтн гиҗ Андрей Алексеевич хальмг үүрмүдтән үрвр кев. Тер юңгад гихлә Әәдрхнә һазрин тууҗ мана таңһчин тууҗла өөрхн залһлдата болна. Цааранднь чигн хамцу үүлдәд, соньн төсвсән күцәхд белн бәәхән эн медүлв.
ОЛЬДАН Цаһан