Лаганя шунмһа күүкд улсин дөң-нөкдәр

Сегодня, 12:58 | Общество, Таңһчин зәңгс, Зіњг

«Көвүн үрән өскхлә йоста залу болдг, күүкн үрән өскхлә бүкл келн-улсан өскдг» гиҗ келдг. Тер юңгад гихлә мел күүкд күн үрән һарһад, алтн уурган көкүләд, саатулын дууһан дуулн бәәҗ, гертән үүл бәрәд, ямр чигн кергән цаг-болзгтнь күцәхәр шундгнь лавта.
Арвн тавн җил хооран Лаганя района седвәртә, шулун-шудрмг, төрскнч седклтә, олна бәәдл-җирһлд шунмһаһар орлцдг күүкд улс цуглрад, күүкд улсин Хүүвин ханьд орв. Тер цагас авн Лаганя района, таңһчин болн Цугәрәсән чигн керг-үүлдврмүдт эдн орлцдг болв, күүкд улсин Хүүвиг болхла Коган Нарн чадмгар һардҗана. Нарн Михайловна цаһан седклтә, дааврта, олн төрмүдт орлцхар шунҗадг нег һазра күүкд улсиг хамцулҗ чадв. Хүүвин ханьд Лаганя районд олн зүсн халхар көдлҗәдг күүкд улс орна, тедн дунд тооч Һәрән Антонина, арһлач Очр-Һәрән Инна, дамшлтта багш Шоңхра Татьяна, ачта амрлһндан бәәдг Фирюза Меджитова, Вера Егорова болн талдан улс мөн.
Хүүвин гешүд цергә шишлң керг-үүлдврт орлцачнрин бүлмүдт, олн үртә эк-эцкнрт, эрмдгтә болн медәтә улст, баһ тетквртә бүлмүдт нөкд болхар зүткнә.
Эн җилин лу сард Төрскән харсачин Өдрлә ирлцҗ, Хүүвин гешүд «Ниицлтин күчн» нертә буйнч концерт бүрдәһәд, цуглулсн мөңгәрн СВО-д орлцачнрин төлә кергтә тоот хулдҗ авад өгүлв. Тер мет дорас өсч йовдг баһчудт төрскнч сурһмҗ өгхин төлә Улан Хол селәнд «Лу сарин салькн» дууна марһа давулсн бәәҗ.
Коган Нарна келсәр, эндр ирлцңгү кергт онц оньган тусхах кергтә, тер юңгад гихлә көвүд-күүкд нег һазра нертә үүлдәчнрән, зөргтә баатрмудан, төрскн һазрин ачта медәтнрән чигн эрк биш медх зөвтә.
Күүкд улсин Хүүвин гешүдт района һардвр, дегтрин саңгин көдләчнр, багшнр, эмчнр, социальн цергллтин мергҗлтнр болн талдан бүрдәцсин элчнр дөң-тусан күргдгин тускар Коган Нарн бас келв.
Келхд, эн җилин моһа сард Элстд таңһчин күүкд улсин ниицәнә ик хург болсмн. Терүнд цуглрсн цуг райодын элчнр хоорндан таньлдҗ, үр-иньгин таалд болсн бүлән харһлтд орлцв. Терүнә йовудт олнд ач-тусан күргсн күүкд улс кесг ачлврмудар темдглгдсн билә. Тедн дунд Лаганя районд өсч-боссн хәәртә үрн, Әрәсән Баатр Очр-Һәрән Нарна эк Кульменә Любовь «Эк-эцкин туурмҗин одн» медаляр ачлгдсн билә. Тер мет Коган Нарн бас «Төрскәннь күүкдт» болн В.С.Гризодубован нертә медальмүдәр ачлгдснь бахмҗ үүдәв.
Немхәс, одахн Лагань балһснд олна дөңнлтин штабин ул деер «Эцкнрин хүүв» нертә олна бүрдәц үүлдврән эклв. Седвәртә эцкнр цуглрад, иим хүүв бүрдәхәр шиидв. Лаганя района һардвр эдниг дөңнв. Таңһчиннь йоста иргнмүд өсксн деерән эдн үрдиннь нәәҗнр болад, керг-төрмүдтнь орлцхар шунҗана. Тегәд эцкнрин Хүүвлә хамдан седвәртә күүкд улс көдлмшән хамцулҗ, төрскн һазр-усна делгрлтин халхар шунмһа кевәр үүлдхәр зүткчәнә.
Әрәсән Президент Владимир Путинә зәрлгәр улсин ниицлтин җил зарлгдснас иштә Хүүвин көдлмш энүнлә ирлцҗ зуралгдв. Нег үлү олн келн-улсин элчнр бәәдг Лаганя районд эннь ик чинртәд тоолгдҗана.
Нарн Михайловнан келсәр, эдн цуһар цаһан седклтә, өр-өвч улс болсар олн-әмтнд дөң-тусан күргхәр шунна. Өдгә цагт Лаганя района күүкд улсин Хүүвин ханьд хойр миңһн шаху күн орна, эдн дунд ик наста улс бәәхинь бас темдглхмн.
Эндрк амр биш цагт хамдан негдәд, арһ-чидлән агсад, нег һазра улстан туслҗахнь урмд өгнә, гиҗ Коган Нарн келнә.

КАРСАНА Евгения

Видео