«Баатрла болсн күүндвр»

Сегодня, 13:24 | Общество, Таңһчин зәңгс, Зіњг, Эдн Төрскән харсла

Баһ Дөрвд селәнә Б.Б.Бадмаевин нертә гимназьд «Баатрла болсн күүндвр» гидг Цугәрәсән төсвин йовудт цергә шишлң керг-үүлдврин ветеран Ханан Дольганла харһлт болв.
Дольган Юрьевич цергә керг-үүлдврт орлцсна, күнд бәәдлд туссн цагт үүрмүдин дөң-нөкд ик чинр зүүдгин тускар келҗ өгв. Күн болһн төрскн һазр-усндан эңкр болҗ, үнн-чик авг-бәрцлә ирлцҗ, олна бәәдл-җирһлд шунмһа кевәр орлцхар зүткх зөвтә гиҗ ветеран сурһульчнрт селвгән өгв. Ханан Дольган олна үүлдвриннь тускар бас хувалцв. Күүкд-көвүд ветераниг оньган өгч соңсад, эрдм шүүҗ авхд сүв-селвг өгхинь сурв. Үр-иньгин таалд болсн харһлтд Дольган Юрьевич сурһульчнриг соньмсулҗадг төрмүдәр тодрха цәәлһвр өгв.
«Баатрла болсн күүндвр» гидг Цугәрәсән төсвин йовудт баһчуд Әрәсән болн Советин Союзин Баатрмудла, нертә болн ачта иргнмүдлә харһна. Эднә залу-зөрмг йовдл баһчудт үлгүр-үзмҗ болҗ, сурһулян сәәнәр сурад, ик күцәмҗ бәрхд урмд өгнә.
БАТАН Сәәхлә

Видео