Шүүврән өгхәр белдҗәнә

Эн җил дунд сурһулян төгсәҗәдг сурһульчнр шаңһа шүүврән шин зокалар өгхмн, шүүвр өглһнә дааврта кем мөчн сарин 1-әс авн эклх. Ямр нег учрар болзгаснь урд шүүврән моһа сарин 20-әс авн өгч болхмн билә. Тиим кевәр багшнр болн сурһульчнр сурһулин җилән мөчн сарин 1 күртл дигтә-даратаһар төгсәх цаг бәәнә. Ик сурһульд орхин төлә хамгин баһ гисн баллын кемҗән бас сольгдв. Үлгүрнь, физикәр 41 балл (урднь - 39) авх кергтә бәәсмн, зәңгллһәр - 46 (44), тууҗар – 40 (36), һазадын келәр – 40 (30), химийәр - 40 (39), биологийәр - 40 (39) балл эрк биш хоршах кергтә болҗана.
Хальмг ик сурһулин номин баһ академин седвәрәр эднә багшнрин орлцлһтаһар 11-ч классин сурһульчнрт ЕГЭ-д сән темдг автха гиһәд кесг кичәләр шишлң керг-үүлдвр бүрдәгдҗәнә. Эндр сурһульчнр шүүврт белдҗәх кемд Хальмг ик сурһулин багшнрин тодрха заавр ик чинр зүүҗәхнь лавта. Тиигчкәд багшнрин тоод шаңһа шүүвриг үнлдг мергҗлтнр орҗана, теднә өгсн зааврнь нег үлү туста болҗахнь маһд уга.
- Хар һазра района Басңга Баатрин нертә гимназин болн Манҗин Нимгрин нертә дунд сурһулин, Целинн района Троицкое селәнә, Элстин 17-ч, 8-ч тойгудта сурһульмудын, Кичгә Төлән нертә Хальмг келн-улсин, Зая-Пандитан нертә келн-улсин сойлын болн Сергий Радонежскийин нертә Орс келн-улсин һурвн гимназин, Социальн-гуманитарн, Элстин техническ болн Элстин лицеймүдин күүкд-көвүд ик сурһулин багшнрла болсн харһлтд орлцв, - гиҗ Хальмг ик сурһулин номин баһ академин һардач Хулхачин Светлана келв.
Ик сурһулин багшнрин һардврт шүүврт белдлһн сурһульчнрт икәр таасгдв. Эдн багшнрла хамдан хамгин нәрн, кавҗрта эсв-төрәр һарһсн эндүһән шинҗләд чиклҗ мергҗлтнрин сүв-селвг оньган өгч соңсв. Хальмг ик сурһулин багшнр, номин кандидатнр, шүүврин комиссьмүдин шинҗләчнр болн гешүд кичәлмүд давулв»: Теднә тоод Һәрән Мергн (тууҗ), Мучкан Светлана (эсв), Сарана Ольга (биологий), Эрднин Эрвена (орс келн), Сумьяна Елена (физик), Амана Даглара (обществознань) зааҗ болхмн.
«Тиим керг-үүлдвриг бидн хойрдад бүрдәҗәнәвидн, балһсна болн райодын сурһульмудын бүрдәцст урдаснь зәңгләд, эн керг-үүлдврт орлцх үрвр кенәвидн. Мана вузин бичкдүдин ик сурһулин багшнр шаңһа шүүвр өглһнә туст райодын сурһульчнрт селвг өгнә, арвтнр болхла тер кичәлд мөңгән өгәд орна. Тедн бийснь Элстүр ирәд эс гиҗ ниигмин сүлҗәнә эв-арһар багшнрин заасиг соңсна. Тиим кевәр мана вузин багшнр таңһчин абитуриентнрин белдврт ик оньган өгнә. Яһад гихлә эднә ик зунь шүүврән өгснә хөөн Хальмг ик сурһульд орна, теднә то җил ирвәс икдүләд бәәх күсл тәвгдҗәнә», - гиҗ Светлана Дорджиевна күүндврән цааранднь давулв.
Удл уга таңһчин сурһульмудт «Сүл хонхин» байр болх, терүнд академин багшнр бас шунлттаһар орлцҗ Хальмг ик сурһулин дацңгудын, тенд дасх эрдмин, номин-шинҗллтин көдлмшин тускар келҗ өгхәр зуралҗана. Тер мет Хальмг ик сурһулин медлд кесг җилин туршарт «Җаңһр» лагерь үүлдҗәнә, тиигәрән цуг райодас селгән болһнд 150 сурһульч ирнә, теднд бас академин багшнр цәәлһвр өгч, таңһчин ик сурһульд дурта эрдм дасх таал бәәнә гиҗ медүлнә.
Мана күүкд дор ормдан суртха гиҗ үрвр кеҗ, эн җил абитуриентнрин то өсх гиҗ нәәлҗ болҗана, гиҗ Светлана Дорджиевна итклтә бәәнә.
Нам Москваһас мана таңһчур зуульчлҗ ирсн сурһульчнрин багин төлә акдемин багшнр экскурсь бүрдәһәд, тедниг соньмсулсн төрмүдәр цәәлһвр өгв.
Хөн сарин 26-д таңһчин цуг сурһульмудт сүл хонх җиңнх, арвтнр тааста ик сурһулян йилһҗ авад, шүүврән өгх. Терүнд күүкднь эк-эцкнрнь чигн бас белдҗәнә.
ТҮРВӘН Һуна