Төрскән харсачнрин санл мөңкрүлҗ

Сегодня, 13:26 | Общество, Таңһчин зәңгс, Зіњг, Эдн Төрскән харсла

Алдр Диилврин сән Өдрлә Үстин района Харба селәнә дунд сурһульд «Баатрмудын ширә» секлһнә керг-үүлдвр болв. Хамдан сурһуль сурч йовсн Мөңкән Владимир болн Лиҗин Саңһҗ цергә шишлң керг-үүлдврт орлцад, залу-зөрмгән үзүләд, баһ-дүүвр насндан әмнәсн хаһцв. Эдниг сурһҗ йовсн багшнрин, хамдан сурч йовсн үүрмүдин болн эндрк сурһульчнрин седвәрәр Төрскән харсачнрин санл мөңкрүлхин төлә ирлцңгү керг-үүлдвр бүрдәгдсн мөн.
Харба селәнә дунд сурһулин һардач Шуркчин Марина харһлтыг нүр үгәр секәд, цергә шишлң керг-үүлдврт орлцачнрин санлд нерәдҗ «Баатрмудын ширә» Алдр Диилврин Өдрлә секгдҗәхнь хойр дам ончта болҗахиг темдглв. Эднә нертә ширән ард сурһулян сәәнәр сурдг, олна бәәдл-җирһлд орлцдг сурһульчнр суудг зөвтә болхмн. Бичкн селәнд өсәд-боссн, мана дунд сурһульд сурч йовсн хальмг көвүд зөрмг өвкнриннь үлгүрәр Төрскән харсад, цергә даалһвран үнн-чик кевәр күцәснь маднд ик бахмҗ үүдәнә гиҗ Марина Гавриловна келв.
Мөңкән Владимир болн Лиҗин Саңһҗ селәнә сурһульд хамдан нег класст сурч йовсмн. Эдн сурһулин бүрдәцин бәәдл-җирһлд шунмһаһар орлцҗ, спортын халхар күцәмҗ бәрҗ, олн үүрмүдтә көвүд бәәсмн. Владимир 9-ч классан төгсәснә хөөн Лагань балһснд олн халхин колледжд сурсмн. 2008 җилд цергт мордад, Архангельск мүҗд церглҗ йовла. Әәрмәс бууҗ ирәд, төрскн селәндән эк-эцктәһән фермерск эдл-ахуд көдлдг болв. Келхд, Юрий Борисович эцкнь Афганистанд болсн дәәнд орлцсн мөн, тегәд көвүнь үлгүр авч зөрмг залу болҗ өссмн. 2022 җилд эн цергә шишлң керг-үүлдврт орлцв. 2023 җилин ноха сард Мөңкән Владимир Донецк Улсин Республикин Урожайное селәнд болсн бәрлдәнд зөрмгән үзүләд, әмнәсн хаһцв. Әрәсән Президентин зәрлгәс иштә Мөңкән Владимир Зөрмгин орденәр ачлгдсмн. Энүнлә хамдан сурч йовсн Лиҗин Саңһҗ 11-ч классин хөөн Хальмг ик сурһульд багшин эрдм дассмн. Хөөннь цергәс бууҗ ирснә хөөн бооца батлад, Төрскән харсхар шиидв. 2022 җилд өркән өндәлһәд, Җирһл авальтаһан көвүн-күүкән өскв. 2023 җилд Лиҗин Саңһҗ Донецк Улсин Республикд церглв. Хамдан церглҗ йовсн үүрмүдин төлә зөрмг дәәч үлгүр болсмн. Нег үлү баахн цергчнрт Саңһҗ килмҗән тусхаһад, дөң-нөкд болдмн гиҗ эдн тодлна. 2025 җилд ДНР-ин Красноармейск района Барановка селәнд цергә даалһвран күцәҗ йовад, хальмг цергч әмнәсн хаһцв. Лиҗин Саңһҗ «Цергә шишлң керг-үүлдврт орлцач» болн «Йилһән сән цергә белдврин төлә» болн «Зөрмгин төлә» гидг медальмудар болн Залу-зөрмгин орденәр ачлгдсмн.
«Баатрмудын ширә» секлһнә санлын керг-үүлдврт Харба селәнә муниципальн бүрдәцин толһач Мухаран Татьяна, Мөңкән Владимирла болн Лиҗин Саңһҗла хамдан сурч йовсн Аҗиглан Савр, эднә эгчнр Бадмин Кермн болн Котинә Валентина үг келҗ, Төрскән харсачнрин санл мөңкрҗ дорас өсч йовдг баһ үйнрин төлә үлгүр-үзмҗ болхинь темдглв.
Сурһулян йилһән сәәнәр сурдг болн «Движение первых» бичкдүдин җисәнә нүүрләчнр Аңһра Увш болн Дюдиша Элвг болн Мөңкән Владимирин ач күүкн 3-ч классин сурһульч Хөөчин Даяна Төрскән харсачнрин ширән ард суух зөв авв. Аңһра Увш ик дааврта зөв өгснд ханлтан өргәд, цааранднь чигн сурһулян сәәнәр сурч, ах үүрмүдин нер өөдән бәрҗ йовх болад цугтаһинь иткүлв.
Тер өдрин бийднь Мөңкән Владимирин болн Лиҗин Саңһҗин гермүдин эрст санлын самбрмуд секгдв. Келхд, көвүд Чечняд зөрмг йовдл үзүләд, әмнәсн хаһцсн Четрә Окан нер зүүдг уульнцд өсәд-боссмн. Эднлә хамдан сурч йовсн үүрмүдин нерн деерәс Евгений Джаныбеков, классин һардач Шуркчин Юлия, эсвин багш Арлдан Роза, ода цергә шишлң керг-үүлдврт орлцҗ йовдг Жужан Олегин эк Елена Саранговна, көвүдин эк-эцкнрин нерн деерәс болхла Алян Наталья үг келәд, баатрмудын санл тевчв.
Тиим әрүн чинртә, төрскнч сурһмҗта керг-үүлдвр Харба селәнд Алдр Диилврин Өдрлә болв. Эн селәнә улсин седвәрәр энд Төрскән харсгч Алдр дәәнд болн Сиврт тууврин җилмүдт әмнәсн хаһцсн нег һазра улсин санлд нерәдгдсн бумб секгдсн бәәнә.
ДООҖАН Наталья

Видео