Городовиковск балһсна гимназин сурһульчнрин күцәмҗ

Сегодня, 13:32 | Общество, Таңһчин зәңгс, Зіњг, Сурєуль-эрдм

Городовиковск балһсна гимназин сурһульчнр Абушинә Арслң, Асархинә Владимир, Устинья Безниско, Алеся Ткаченко, Шаран Элина таңһчин марһанд диилвр бәрәд, Москвад болсн Әрәсән ашлгч керг-үүлдврт орлцҗ тенд чигн йилһрв. Эдн Әрәсән Келн-улсин төвин талвңд тууҗин, сойлын, номин болн техникин салврин медрлән үзүлҗ талдан регионмудын багмудла марһлдв.

Терүнә өмн сурһульчнр хойр җилин эргцд гимназин һардачин селвгч, «Медрл» ниицәнә лектор Наталья Шевченкон һардврт «Медрл» гидг марһанд орлцҗ таңһчин хамгин сән баг болҗ бийән үзүлв.
Москвад ирәд Улан талвңд, Зарядье паркд, ГУМ-д, ВДНХ-д болн нань чигн һәәхмҗтә һазрт одад, хотл балһснла өөрхнәр таньлдҗ, мана орн-нутгин тууҗин болн сойлын туск медрлән гүүдүлв, соньн кесг тоот үзв.
«Сегәтнр» гидг таңһчин багин һардач Наталья Шевченко Цугәрәсән марһана тускар иигҗ келв: «Дөрлдән соньн кевәр бүрдәгдв, орлцачнр кесг салврин сурврмудт хәрү өгв. Әрәсән улсин ниицлтд нерәдсн сурврмудт һол оньг өггдв. Тер мет Төрскән харсгч Алдр дәәнд диилвр бәрснә йовдлын тускар жюрин гешүд сурв, яһад гихлә дөрлдән Диилврин 81 җилин өөн темдглснә хөөн болсмн. Мана гимназин элчнр өөдән күцәмҗ бәрәд диплом авад, дарук җилин марһанд орлцх зөв авв».
Марһанд орлцсн сурһульчнр бас тоолврарн хувалцҗ байр-бахмҗан медүлв. «Цугәрәсән «Медрл» ниицәнә марһанд дарук җилд бас орлцхар зуралҗанав, зуг тер кемд негдгч ормд һарх санатав. Эн ашлгч дөрлдәнд орлцад, марһана йовудын тускар сәәнәр медҗ авув. Ямаран төрәр медрлән гүүдүлхин тускар медҗ, дииләчин өөдән нер зүүхин төлә дигтә-даратаһар белдх кергтә», – гиҗ Городовиковск гимназин 9-ч классин сурһульч Абушинә Арслң келв.
Терүнә үр, хамдан нег класст сурчадг Асархинә Владимирин келсәр, «медрл» ниицәнә марһан йир соньн болв, талдан регионас ирсн кесг күүкдлә эн таньлдв. Марһана кесг девсңд сәәнәр белдәд хойрдгч орм эзлснь эднд ик урмд өгәд, дарук җилд иигәрән ирҗ диилвр бәрх санаһан медүлв.
«Медрл» ниицәнә марһан «Әрәсә күн болһна арһ-чидл урһадг орн-нутг» гидг ик төсвин йовудт болна. Эн дөрлдәнд күцәмҗ бәрҗ, түрүн болҗ хойрдгч орм эзлсн хальмг арвтнрин ик диилврнь болҗана. Городовиковск гимназин багиг болн терүнә һардач Наталья Шевченког эн ончта йовдлла йөрәҗ, дарук җилд улм өөдән күцәмҗ бәртн гиҗ дурдҗанавидн. Городовиковск балһсна арвтнрин багин шунлтта үүлдвр мана таңһчин талдан күүкдт сән үлгүр болҗ, тедниг чигн «Медрл» ниицәнә болн нань чигн марһаст орлцулхд урмд өгтхә!

ТҮРВӘН Һуна
Зургт: Городовиковск гимназин арвтнрин баг Цугәрәсән марһанд

Видео