Бахмҗ болх улсин нерд заагдхмн

Сегодня, 11:38 | Общество, Зіњг, Сойл

«Келн-улсин бахмҗ – 2026» гидг марһанд Хальмг Таңһчин әмтн орлцҗ чадҗана. Цугәрәсән олна мөрән VII марһанд орлцх улсин нердиг зааҗ болхмн. Әрәсән келн-улсин негдлт батллһнд болн этносойлын делгрлтд ач-тусан күргҗәдг улсин нердиг тер марһанд орулх арһ бәәнә.
«Келн-улсин бахмҗ - 2026» гидг мөрә олна үүлдврт, келн-улсин хоорндк хәрлцә делгрүллһнд орлцдг эврә сән дурар кедг олна көдлмш күцәҗәдг седвәртә үүлдәчнриг темдглх күслтәһәр үүдәгдсн болна.
Давсн җилд эн мөрән марһанд Хальмгас хойр күн орлцсмн. «Әрәсән олн келн-улсин сойл хадһллһнд болн делгрүллһнд ач-тусан күргсн төлә» гидг халхд марһана шаңһа девсңд негдгч девсңгин дииләчин нер Хальмгин Баатр, РСФСР-ин билг-эрдмин ачта үүлдәч, «Өөрднр» гидг бииһин театрин бүрдәһәч болн художественн һардач Нәдвдә Петр зүүсн билә. Марһана дуһргин девсңд Хальмг Таңһчин улсин эдл-ахун ачта көдләч, Хальмг Таңһчин күндтә иргн Гелий Константинович Ким темдглгдсн мөн. «Келн-улсин хәрлцәнд хамгин сән дамшлт орулсна төлә» гидг халхар эн ончрсмн.
Эн җилд мөрә долан халхар өггдх болв: «Әрәсән келн-улсин ниицлтд цергллһн», «Әрәсән келн-улсин төрскн келн», «Әрәсән келн-улсин сойл», «Олн келн-улсин Әрәсә медиан аһуд», «Сән гисн этнодамшлт», «Чадмг һардач» болн «Ум үйин баһчуд».
Ирлцңгү кесг халхар әмтн эрлһ орулҗ чадҗана. Мөрә авхин төлә зарлгдсн марһанд онц улс, коллективс болн бүрдәцс чигн орлцҗ чадҗана. Хальмгас марһанд орлцх седклтә улсин эрлһс Өмн үзгин шаңһа дуһргин кемҗәнд хәләҗ үнлгдхмн, әмтнә эрлһс һаха сарин 1 күртл орулҗ авгдхмн. Дуһргин девсңд диилвр бәрсн улс болн коллективс марһана шаңһа девсңд орлцхмн.
«Келн-улсин бахмҗ - 2026» гидг мөрән тускар https://гордость-нации.рф. гидг сайтд медҗ болхмн.
ҖИРҺЛИН Кермн

Видео