Әрәсән делгрлтин һол зөрүллтс батлгдв

Сегодня, 12:20 | Экономика, Общество, Таңһчин зәңгс, Хальмг Тањєчин Толєачин ґдр-бўр, Зіњг

Санкт-Петербург балһснд 2026-ч җилин экономикин нарт-делкән XXIX ик хург болв. Эн чинртә керг-үүлдвр 1997 җиләс авн давулгдҗана.
Эн җил делкән хургт 130 һар орн-нутгас ут тоодан 20 миңһн һар күн ирҗ орлцв. Күндтә гиич болад Саудовская Аравия орн-нутгин элчнр ирв, тер юңгад гихлә 2026 җилд Әрәсә эднлә дипломатин хәрлцә батлгдснас авн дигтә зун җил болв. Дөрвн өдртән болсн хургин йовудт олн зүсн төрмүдәр чинртә 150 харһлт болн сүүр давулгдв.
Хальмг Таңһчин делегац энүнд орлцснь темдгтә болв. Хальмгин залврин Ахлач Босхмҗин Гилән, тер мет энүнә дарукс Шурһчин Очр болн Этән Алексей, экономикин болн хулд-гүүлгәнә министр Чиҗин Андрей, сойлын болн зуульчллһна министр Бембин Евгений чинртә кесг сүүрт орлцсн болдг.
Харһлтсин ашар мана таңһч Тульск мүҗлә нөкцлтин бооца батлхар үгцв. Терүнәс нань Китдын орн-нутгла нөкцлтән цаарандан делгрүлхин төлә Босхмҗин Гилән ирлцңгү сүүрт бас орлцв. Терүнд Гилән Герасимовна эндр Китдын бизнесин элчнрлә ямр төсвс күцәҗәхән тодрхаһар келҗ өгв. Цааранднь эн көдлмш улм делгрүлх болҗ зуралгдҗана.
Залврин Ахлач Босхмҗин Гилән Әрәсән-Китдын коммерцин бүрдәцин элчнрлә бас харһҗ күүндв. Терүнә йовудт экономикин, зуульчллһна, селәнә эдл-ахун халхар нарт-делкән нөкцлтән өргҗүлхин туст күүндвр болв. Хальмг тохма малын мах болн манад урһҗадг тутрһ Китдын элчнриг соньмсулв.
Онц темдглхд, Хальмгин залврин Ахлач Босхмҗин Гилән болн Әрәсән Залврин медлд бәәдг шинҗллтин Төвин һардач Константин Калинин нөкцлтин бооца батлв. Энүнә йовудт социальн-экономикин, промышленностин, АПК-н, эрүл-менд харлһна, сурһуль-эрдмин, зуульчллһна болн то-дигин делгрлтин хамцу төсвс күцәгдхмн.
Делкән чинртә экономикин ик хургт Хальмгин сойлын болн зуульчллһна министр Бембин Евгений түрүн болҗ орлцв. Сүл җилмүдт Хальмг Таңһчин тууҗ, сойл, авг-бәрц олн зуульчнриг соньмсулад, эдн мана тал олар ирҗәнә. Эн халхиг өргнәр делгрүлхин төлә шин эв-арһс олад көдлх кергтә, гиҗ Евгений Владимирович келв.
«Сойлын инвестиц регионмудын делгрлтин күчн», «Өдгә цагин кинематограф» болн талдан сойлын халхар болсн сүүрмүдт Бембин Евгений орлцсинь заахмн.
Тер мет Хальмг Таңһчин делегацин элчнр то-дигин делгрлтин, хулд-гүүлгәнә әәмшг уга бәәдл тогталһна, Әрәсән-Китдын хоорндк нөкцлтин болн талдан кесг халхар нәрн төрмүдәр болсн сүүрмүдт орлцсн болдг.
ПМЭФ-ин йовудт гиигн атлетикин Цугәрәсән федерацин ахлач Петр Фрадков орн-нутгин спортын министр Михаил Дегтяревд әмтн гүүдг Төвмүд тосхлһна туск төсвин тускар цәәлһҗ келв. Мана таңһчин төлә эннь бас темдгтә, юңгад гихлә иим төв тосхх 22 балһсна тоод мана Элст бас орв.
Мөчн сарин 5-д экономикин нарт-делкән XXIX ик хургин йовудт чинртә өргн сүүр болв. Терүнд Әрәсән Президент Владимир Путин орлцв. Күндтә гиичнрин тоод Узбекистана президент Шавкат Мирзиеев, Танзания орн-нутгин президент Самия Сулуху Хассан, Китдын Улсин Республикин ахлачин дарук Хань Чжэн эн керг-үүлдврт орлцв. Энткгин India Today медиахолдингин редактор, дамшлтта седкүлч Гита Мохан сүүриг чадмгар һардҗ давулв.
Әрәсән Президент Владимир Путин экономикин то-дигин, регионмудыг дөңнлтин, бизнесин, социальн халхин болн талдан чинртә төрмүдин тускар келв.
2026 җилин ашар мана орн-нутгт инфляц 5,2 процентд өсхмн гиҗ күләгдҗәнә. Сүл хойр җилин туршарт шаңһа төв регионмудын 440 җува арслң хазна кредитин мөңгиг даңцав. 2030 җил күртл дәкәд 700 җува арслң даңцагдхмн. Давсн тавн җилин ашар болхла Әрәсәд көдлҗәдг улсин җалв 30 процентд өсв гиҗ темдглв. Тер мет баһ болн дунд бизнесин элчнрин төлә алвна кемҗән баһрсн болв.
Цергә шишлң керг-үүлдврин төр бас эн сүүрт босхгдв.
Ут тоодан дөрвн частан болсн сүүрт олн зүсн төрмүд босхгдад, эдниг иргнмүдин сә хәәлһнә туст хаһлх болҗ шиидгдв.
Хальмг Таңһчин Толһач Хаска Бату болн залврин Ахлач Босхмҗин Гилән эн сүүрт орлцсн билә. Энүнә хөөн Бату Сергеевич нег һазра седкүлчнрлә ухан-тоолврарн хувалцв.
– Өргн сүүрт тодрха болн соньн күүндвр болв. Әрәсән Президент Владимир Путинә темдглсәр, мана орн-нутг делкән талдан орн-нутгудла нөкцлтән өргҗүлхдән даңгин белн бәәнә гиҗ келв. Арвад җилин туршарт цуг делкә оңдарв, зуг эннь делгрлтин төлә шин эв-арһс олҗ үүлдхд туслна. Бизнесин нүүрлгч бүрдәцс регионмудт секгдхмн, көдлмшч шин ормс бүрдәгдәд бәәхмн. Президентин келсн цуг тоотыг учртан авад, эврәннь көдлмштән олзлх кергтә, – гиҗ Хаска Бату онц темдглв.
Экономикин, шин технологин, социальн болн талдан төрмүд керг-үүлдврин йовудт бас хаһлгдв. Санкт-Петербургд болсн ик хургт орлцад, Әрәсән регионмудла нөкцлтән батрулдг эв-арһ учрсиг үнлх кергтә.
КАРСАНА Евгения
Әрәсән делгрлтин һол зөрүллтс батлгдв
Зургт: Хальмгин залврин Ахлач Босхмҗин Гилән болн Әрәсән Залврин медлд бәәдг шинҗллтин Төвин һардач Константин Калинин нөкцлтин бооца батлв

Видео