Сурһулин ясвриг бүрткв

Шидр Хальмг Таңһчин залврин Ахлачин дарук – таңһчин то-дигин делгрлтин министр Этән Алексей Приютна района Первомайский селәнә лицейд кегдҗәдг бат ясврин йовудыг бүрткв. Ясврин көдлмш «Баһчуд болн бичкдүд» гидг келн-улсин төсвин «Хамгин сәнь бичкдүдт» гидг таңһчин көтлврин йовудт күцәгдҗәнә. Тер мет таңһчин сурһуль-эрдмин бүрдәцин бат ясвр «Негдсн Әрәсә» партин улсин көтлврин һоллгч зөрүллтсин негнь болна.
Ясврин көдлмш дигтә-даратаһар күцәгдҗәнә. Тосхачнр хуучрсн үүдд, терзмүдинь, ораһинь соляд шинрүлв. Бат ясврин йовудт дулаһар, усар, электрокүчәр тетклһнә төрмүд хаһлгдҗана. Өдр болһн энд 50 тосхач көдлҗәнә, эдн цуг көдлмшән өөдән чинртәһәр болн цаг-болзгтнь төгсәхәр шунҗана.
- Сурһулин шин җил удл уга эклхмн. Эн җил мана таңһчд 21 сурһуль болн бичкдүдин 6 сад ясгдҗана. Ясвр кегдҗәдг сурһулин бүрдәцст дару-дарунь одад, тосхачнрин көдлмш бүрткнәвидн. Хальмг Таңһчин Толһач Хаска Батун темдглсәр, мана бичкдүд билг-эрдмән делгрүлҗ, сурһулян сәәнәр сурхин төлә сән таал тогтах зөвтәвидн. Удл уга селәнә лицейин сурһульчнр болн багшнр кеерүлгдсн сурһульдан ирхмн, - гиҗ Этән Алексей келв.
БАТАН Сәәхлә