Хальмгин нер дуудулҗана

Сегодня, 09:28 | Спорт, Таңһчин зәңгс, Зіњг

Нег һазра мана спортсменмүд нарт-делкән болн Цугәрәсән марһаст күцәмҗ бәрәд, таңһчин нер цаарандан дуудулҗ йовна.
Шидр Әрәсән хаһачнрин марһанд Людмила Курнеева Энкира күүктәһән ончрад, алтн медаляр ачлгдв. Тер марһанд хальмг көвүн Эрднин Бембә цаһан мөңгн медаль шүүҗ авв. Тиигәд таңһчин һурвн элч орн-нутгин хамцу багд орснь темдгтә болв.
Тер мет Одинцово балһснд болсн тхэквондон марһанд таңһчин элчнр бас ончрв. Москвад Лужники спортын төвд бөкнр Җивлән Арслң болн Бембин Данзн бас сән күцәмҗ бәрв. Талдан мана бөк Һәрән Мингиянд «Әрәсән спортын эрдмч» гидг цол зүүлһгдв. Эн җил Мингиян Братислава балһснд нарт-делкән марһанд Әрәсән орн-нутгиг элчлхмн.
Сарпуль балһснд армрестлингин марһана ашар болхла Вадим Слюсарев күрл хойр медаляр ачлгдв.
Цуг эн күцәмҗ эк-эцкнрин, дамшачнрин болн спортсменмүдин хамцу көдлмшин аш болҗана. Тиим кевәр даавртаһар көдләд, цааранднь күцәмҗ бәрҗ йовтн, – гиҗ Хаска Бату дурдсн болдг.

ОЛЬДАН Цаһан

Видео