Багшин сурһмҗнь туста болна

Сегодня, 12:38 | Общество, Таңһчин зәңгс, Зіњг

Элстин политехникин колледжд хөрн дөрвн җилдән химийин болн биологийин багшар Асархинә Елена (зургт) көдләд, арвтнрт бат медрл өгчәнә. Әрәсән «Эрдмчнр» гидг төсв күцәлһнә йовудт дарук җилд эднә колледжд 100 һар сай арслң өггдхмн, хамгин түрүнд терүг тосхачнрин эрдм дасчадг арвтнрин сурһульд һарһхмн, яһад гихлә туслң тиим көтлврин делгрлтд тер мөңгн өггдҗәнә. Тиим дөң мана таңһчин СПО-н бүрдәцд түрүн болҗ йилһгдҗәнә, таңһчин һардврин орлцлһтаһар эн керг бүтв гиҗ онц заах кергтә. Тегәд тосхачнриг белддг цуг лабораторьмуд шинрүлгдх, тер тоод химийин болн биологийин, талдан чигн кичәлин хорасин төлә шин кергсл хулдҗ авгдхнь лавта.
Тиигхлә Елена Басановна эврә кичәлән улм соньнар давулҗ, сурһульчнртан гүн медрл өгхнь лавта. «Биологийин болн химийин сән медрлтә сурһульчнр мана тал ирнә, теднд олн зүсн даалһвр өгч, кесг дамшлт күцәһәд, кичәлән соньнар бүрдәхәр шуннав. Болв кесг тоотыг меддгонь чигн бәәнә. Теднә белдвринь йилһҗ авхин төлә колледжд орсн арвтнр шишлң көдлмш бичнә, тиигҗ мана оютнрин медрлинь шинҗлнәвидн. Кергтә болхла немр кичәлд цәәлһвр өгнәвидн»,- гиҗ Елена Басановна келнә.
Энүнә кесг сурһульчнр Хальмг ик сурһульд болн талдан чигн вузмудт медрлән гүүдүлнә. Наадкснь колледжин хөөн Элстд, райодт эс гиҗ нам талдан регионмудт тосхлтын бүрдәцст көдлмш олҗ авна.
Елена Басановна сурһульчнртаһан ээлтәһәр күүндҗ, эс медгдсн тоотынь кесг дәкҗ цәәлһҗ, зәрм оютнрт немр даалһвр өгч, цугтаднь әдл медрл өгхәр шунна. «Елена Басановна – күндтә багшнрин негнь, энүнә сурһульчнр СПО-н бүрдәцс дунд болдг олимпиадмудт орлцҗ нүүрлгч орм эзлнә, химийин болн биологийин халхар сән медрл үзүлнә. Химийәр болсн Цугәрәсән диктантд энүнә оютнр ончрна. Иргчдән мергҗлтнр тиим кевәр эврә көдлмшән сәәнәр күцәтхә гиҗ эднд эрдмин кичәләр бат медрл өгсн деерән, хоршасн дамшлтынь байҗулна», - гиҗ политехникин колледжин һардачин дарук Жанна Сильнеева келнә.
Тиигҗ дамшлтта багшин кичәлд оютнр ухалдг, юм шинҗлдг дасна, кесг сурврт хәрүһинь олҗ авна. Тиим хәләц һоллгч эрдм даслһнд чигн туста болна. Олн җилдән таңһчд кергтә мергҗлтнриг белдлһнд ач-тусан күргсн төлә Асархинә Елена Элст балһсна толһачин болн таңһчин сурһуль-эрдмин министерствин Күндллһнә һашгудар ачлгдсмн. Медрлән гүүдүлхин төлә Елена Басановна номин-дамшлтын хургудт, семинармудт болн селвлцәст орлцна. Байн дамшлтта багш эврә эв-арһ олзлҗ кичәлән бүрдәнә, номин-шинҗллтин көдлмшән барлна, мергҗлтән кезә чигн өөдлүлҗ, цагин некрвлә ирлцҗ көдлнә. Арвтнрт сән сурһмҗ өгч, җирһлин хаалһинь йилһҗ авхд теднд нөкд болна.
Түрвән Һуна

Видео