Келн-улсин театрин шин наадд

Сегодня, 11:42 | Общество, Таңһчин зәңгс, Зіњг, Сойл

Намрар театрмудт шин кем эклнә. Басңга Баатрин нертә Келн-улсин театр шин наадд үзүлхмн. 2026 җил театрин үүлдврт йир ончта болҗана, эн 90-ч кемдән көшгән секв. «Мини Арслң» гидг наадар эклснь темдгтә болв. Лев Гумилевин «Җамуха нойна үкл» үүдәврәр эн наадыг якутск режиссер Андрей Борисов белдв.
Нер туурсн номт Лев Гумилев бийән Арслң гиҗ дууддг бәәҗ. Тернь учрта. Түүрвәчин җирһлд учрсн дурн һашута йовдлд хүврв. Дуту хөвтә дурнь номтын җирһлд мартгдшго мөрән үлдәҗ. Тиигәд эн нааднд олн тоот ниилҗ, гүн ухата Җамухан болн Темүҗинә хоорнд учрсн тоотыг медүлхәр режиссер зүтксмн.
Алдр Чиңһс хаана цагин зәрм халхинь үзүлҗәдг наадн олн улсиг соньмсулв. Театрт эн асхн олн күн цуглрҗ ирв. Таңһчин сойлын болн зуульчллһна министр Бембин Евгений, театрин болн сойлын нертә үүлдәчнр, номтнр, олн улс тәәз деер болҗасн тоотыг оньган өгч хәләв.
Наадна өмн Әрәсән Федерацин билг-эрдмин ачта үүлдәч, Келн-улсин театрин художественн һардач болн режиссер Манҗин Борис эн наадн яһҗ үүдснә тускар келҗ өгв. Архитектор Пүрвән Җаңһр эн наадыг Манҗин Борист өгсн бәәҗ. Болв олн-зүсн учрар терүг тәвх арһ учрлго бәәсмн. Ода эн наадн нертә режиссер Андрей Борисовин һардврт тәәз деер әмтнә оньгт тусхагдв. Тууҗин төрмүд, тер тоод Чиңһс хаана цаг нертә якутск режиссериг соньмсулна. Лев Гумилевин шинҗллтс болн үүдәврмүд энүнд бас өөрхн болв.
«Театрин билг-эрдмин халхар нер һарсн билгтә режиссериг би сәәнәр меднәв, - гиҗ наад тәвсн Андрей Борисовин тускар Борис Наминович келнә. - Эн билгт Әрәсән Федерацин улсин артист, шаңһа мөрәһәр ачлгдсмн. 1981 җиләс авн экләд, энүнә һардврт Якутск театр цуг делкәд темдгтә болсмн. Би Якутьд кесг дәкҗ одлав, эднә театрт наад белдләв. Андрей Борисовиг дуудҗ, мана театрт наад тәвх седкл нанд билә. Ода сансн санан күцв. Эн билгт наад белдҗәсинь оньган өгч хәләвүв. Нааднд учрҗадг йовдлмудын тускар режиссер соньнар цәәлһҗ чадна. Андрей Саввич дәкәд чигн мана театрт ирҗ наад тәвх гисн ицл бәәнә. Хамцу көдлмш соньн болв», - гиҗ Борис Наминович үгән товчлв.
Лев Гумилевин җирһлин тууҗиг дахулҗ, түүрвәчин бичсн һашута наадна һарцсар семрҗ үзүлгдснь соньн болв. Эн үүдәврт тууҗд болсн йовдлыг Гумилев эврәһәрн үзүлҗәнә. Темүҗинә өөрхн иньг бәәсн Җамухан дүриг невчк талданар түүрвәч үзүлҗәнә. Теегт сулддан бәәдг әмтнә җирһлиг хойр үүрин хәрлцән медүлнә. Хаана йосн догшн болдгинь кен эс меднә. Тууҗин тер хол цагт теегт ямаран догшн закад ахлҗасинь медҗ авхд наадн туста болв.
- Театрин 90 җилин өөнд нерәдсн байрин керг-үүлдвр үкр сарин 8-д болхмн. Басңга Баатрин нертә театрин художественн һардачин келсәр, театрин ончта өөнд нерәдсн «Парад премьер» гидг наадм болхмн. «Терүнә йовудт бидн шин нааддан үзүлхвидн, - гиҗ Борис Наминович келнә. – Дөрвн наадн әмтнә оньгт тусхагдхмн. 90 җилә тууҗдан орсн Басңга Баатрин нертә Келн-улсин театр олн хәләһәчнрән тиигҗ байрлулхмн.

ҖИРҺЛИН Кермн

Видео