Ар Үзгин Осетин оркестр Элстд ирв

Сегодня, 13:39 | Общество, Таңһчин зәңгс, Зіњг, Сойл

Хальмгин Келн-улсин оркестрин седвәрәр мана таңһчд келн -улсин оркестрмүдин байрин харһлтс болв. Ар Үзгин Осетин – Аланя Келн-улсин оркестр Элстд ирәд, Хальмгин Келн-улсин оркестрлә хамцу үүлдврән эклв. Манҗин Аркадин нертә Хальмг филармоньд хойр коллективин хамцу концерт болв.
Әрәсән сойлын министерствин, «Росконцертин» болн Хальмгин сойлын болн зуульчллһна министерствин дөңгәр көгҗмин иим харһлтс Элстд түрүн болҗ кегдҗәнә, гиҗ Келн-улсин оркестрин һардач Нимгрә Оксана келнә.
- Мана хәләһәчнриг зер-зевсгүдин көгҗмлә таньлдулх наадмиг Келн-улсин оркестр Санкт- Петебургин «Метелица» гидг оркестрла хамдан экллә, - гиҗ Келн-улсин оркестрин художественн һардач Катан Савр келв. Осетин оркестр Элст балһсна бичкдүдин көгҗмин болн билг-эрдмин сурһулин бүрдәцсин сурһульчнрла харһҗ, осетин келн-улсин зевсгүдин тускар келәд, цәәлһвр өгв.
Ар Үзгин Осетин-Аланя Келн-улсин оркестрин һардач болн художественн һардач Тенгиз Кумаритовин келсәр, Хальмгин оркестриг гиичнр сән меднә, көгҗмин олн хәләврмүдт, нань чигн хамцу үүлдврт эдн хамдан орлцҗ йовсмн. Әрәсәд олн җилдән үүлдҗәдг көгҗмин коллективин оркестр тәәз деер һарч ирсн цагасн авн хальмг хәләһәчнриг осетин улсин көгҗмлә болн дууна авъясмудла таньлдулна.
Хамцу концертд Хальмг Таңһчин ачта артистк Ангелина Серова гиичнрин оркестр дахч осетин ду дуулсиг әмтн бүләнәр тосв. Ар үзгин Осетин улсин артист Эдуард Дауров, хальмг улсин артист Мергн Ким дуулсн дуд өврмҗтә болв. Осетин улсин гарма татад, Ар Үзгин Осетин улсин артистк Марина Хутугова цуглрсн әмтнд ик байр үүдәв. Концертин йовудт хальмг артистнрт ачлврмуд бәрүлҗ өггдв. Дууч Эдуард Дауров Ар Үзгин Осетин - Алания Республикин Толһач Сергей Меняйлон нерн деерәс Данара Шалхановад Күндллһнә һашг бәрүлҗ өгв. Эднә сойлын министерствин Күндллһнә һашгар дууч Мергн Ким ачлгдв.
Хальмг Таңһчин ачта артистк Диана Босхомджиева ут ду дуулад, хальмгудын кезәңк авъясар гиичнрин оркестриг һардҗ ирсн Тенгиз Кумаритовд цаһан хадг татад, күндллһән медүлв. Билгтә дуучин дуд чигн цуглрсн улст сергмҗ үүдәв. Хойр келн-улсин хамцу концерт йоста иньгллтин темдг болв.
ҖИРҺЛИН Кермн

Видео