Сурһульчнрин медрлинь гүүдүлхин төлә

Сегодня, 13:56 | Общество, Таңһчин зәңгс, Зіњг, Марєан

Хальмг Таңһчин «Билгтә бичкдүдин төв» сурһульчнрин медрлинь гүүдүлхин төлә соньн керг-үүлдвр бүрдәнә. Хулһн сарин 28-д энд регионмудын хоорндк химийин XIII марһан болв. Эн ик кемҗәтә дөрлдән М.В. Ломоносовин нертә Москван ик сурһулин седвәрәр давулгдв.
Таңһчин марһанд Элстин болн райодын сурһульмудас ут турштан 82 арвт орлцв. Эднәс 8 баг бүрдәв. Давсн җилин ашар Элстин лицейин «Новый элемент» гидг нертә баг диилвр бәрҗ цааранднь Москвад болсн ашлгч марһанд орлцҗ, таңһчин нер харсв. Ода һурвн җил дарандан таңһчин девсңгин дөрлдән болҗана.
Бүрдәмҗин комитетин нерн деерәс марһана урдк жюрин гешүн Кирилл Грицко йөрәлин үг келв. Давсн җилд 4800 орлцач медрлән сөрв. Эн марһана йовудт номин халхар хоршасн күцәмҗән энд иткүлҗ болҗана. Тадн ода 9-11-ч классмудт сурнат, таднд өгсн даалһвриг болхла вузин оютнр, нам аспирантнр болн номин кандидатнр күцәҗ үзнә гиҗ күндтә гиич темдгләд таңһчин марһан эклсиг зарлв.
Уйн наста химикүд гүн медрлән үзүлҗ үүлдв. Эднә көдлмшиг үнлсн жюрин ханьд Хальмг ик сурһулин номтнр болн Элстин болн райодын сурһульмудын багшнр орсмн.
- Бидн Целинн района Саңһҗин Босян нертә сурһуляс ирләвидн. Эн марһанд хойрдад орлцҗанавидн. Түрүн саамд хойрдгч орм эзлләвидн. Энд көвүд-күүкд эврән талдан багин даалһвр яһҗ күцәгдсинь шинҗлнә. Хойр командын күүндвриг жюри үнлнә. Тавн балл хамгин ик темдгнь болна», - гиҗ химийин багш, жюрин гешүн Очра Екатерина тоолврарн хувалцв.
Тиим марһас номин халхар күүндвр кедгиг, хамцу көдлдгиг дасхна. «Эн дөрлдәнд би хойрдад орлцҗанав, яһад гихлә эн керг-үүлдвр нанд таасгдв. Багин ханьд чик тәәлвр олҗ авдг эв-арһ йир соньн болна. Илкдл кеһәд, талдан багин хәәврин көдлмш үнлҗ, теднд кавҗрта сурвр өгснь бас соньмсулна», - гиҗ Элстин олн салврта гимназин 10-ч классин сурһульч Картенә Екатерина келв. Тиим кевәр сурһульчнр йоста шинҗләчнр, номтнр болад, химийлә бәәдл-җирһлән залһлдулхар седҗәнә.
Эн таңһчин марһана ашар Элстин лицейин «Изотопы» баг түрүн орм эзлв. Хотл балһсна хойрдгч тойгта дунд сурһулин «Сверхтялые» баг хойрдгч ормд һарв. Саңһҗин Босян нертә Целинн района Троицкое селәнә дунд сурһулин элчнр һурвдгч орм эзлв.
Онц сурһульчнр дунд Саңһҗин Босян нертә дунд сурһулин «Атом» багин орлцач Хахан Анна дииләч болв. «Йилһән сән илдкәч» гидг нер Элстин лицейин «Изотопы» багин орлцач Канан Дельвира зүүсн болдг.
- Давсн җилд таңһчин багмуд дунд диилвр бәрсн Элстин лицейин элчнр ода 11-ч класст сурчана, шүүврт белдҗәнә. Тегәд ода эдн нааран ирсн үүрмүдләрн хоршасн медрләрн хувалцҗ, чик тәәлвр яһҗ түргәр олҗ авдгинь келҗ өгч, эндрк мана диилвр теткв гиҗ темдглҗ болҗана.
Марһана даалһвр амр биш болна, мана сурһульчнр дигтә-даратаһар белдв, тегәд эдн диилвр бәрх гиҗ нәәлҗәнәв, - гиҗ дөрлдәнә өмн Элстин лицейин химийин болн биологийин багш Наталья Неснова тоолвран медүлв.
Сурһульчнран тиим чинртә дөрлдәнд белдсн багшнрт бидн ханлтан өргҗәнәвидн, иргчдән болх марһаст тана күүкд улм өөдән күцәмҗ бәртхә гиҗ дурдҗанавидн.
ТҮРВӘН Һуна

Видео