«Цецгәрич, эңкр Хар Һазрм!»

Сегодня, 14:28 | Общество, Таңһчин зәңгс, Хальмг Тањєчин Толєачин ґдр-бўр, Зіњг

Шидр Элст балһснд Манҗин Аркадин нертә филармоньд Хар Һазра района 75 җилин өөнд нерәдгдсн байрин хург болв. «Цецгәрич, эңкр Хар Һазрм!» гиҗ нерәдгдсн керг-үүлдврт района әмтн, тенд урднь көдлҗ йовсн улс, таңһчин күцәгч йосна болн зака үүдәгч бүрдәцсин элчнр ирҗ орлцв. Хальмг Таңһчин Толһач Хаска Бату, Хальмг Таңһчин Улсин Хуралын (Парламентин) Ахлач Артем Михайлов, таңһчин залврин Ахлач Босхмҗин Гилән, Әрәсән Федерацин сенатор Хачира Борис бас хургт орлцад, района улсиг йөрәв. Хар Һазра района толһач Болдра Валерий күндтә гиичнриг тосч авад, хадг татад, хальмг цәәһәр болн боорцгар тоов.
Байрин хург Хар Һазра частрар эклв, района босхмҗд болн делгрлтд ик ач-тусан күргҗ, эврә һазр-усна делгрлтин халхар олн җилдән көдлҗ йовсн улсин тускар видео зурц үзүлгдснь соньн болв. Хальмгин Баатр Болдра Валерий нег һазра улсиг ончта өөнлә йөрәһәд, эн җилмүдин эргцд эднә район талдан муниципальн бүрдәцс дунд зөвтә орман эзлсиг темдглв. Советин Союзин Күч-көлснә Баатрмуд Бурила Илья болн Лукшана Егор, Ленинә орденәр ачлгдсн нертә хөөч Адьяна Дулахн, таңһчин эрүл-менд харлһна түрүн нарком Душана Үлмҗ, хальмг улсин бичәчнр Басңга Баатр болн Манҗин Нимгр, Хальмг Таңһчин частрин түүрвәч, Хальмгин күч-көлснә Баатр, хальмг улсин шүлгч Шугран Вера, нертә көгҗмч, Хальмгин Баатр Манҗин Аркадь, Олимпийск нааддын дииләч Семена Мингиян – эднә нерд төрскн һазриннь тууҗд мөңкинд орсн мөн, гиҗ района толһач бахтв.
Хар Һазра район кемҗәһәрн мана таңһчд хамгин ик болна, энд нәәмн муниципальн бүрдәц бәәнә гиҗ Хальмг Таңһчин Толһач Хаска Бату келв. Эн һазрт бәәдг нефть района болн таңһчин олз-ору икдүллһнд туслх зөвтә, бидн ода эн төр хаһлҗанавидн. Района йиртмҗнь өвәрц, энд «Хар һазр» гидг заповедник, Меклетинск нур, Кума һол, өврмҗтә элс чигн олҗ болхмн, нааран олн зуульчнр ирхин төлә сән таал тогтах кергтә. Эн җил төгстл бидн мана таңһчд зуульчллһ делгрүллһнә төсв белдхвидн, Хар Һазра район олн гиичнриг соньмсулх зөвтә. Зуульчллһ делгрүлхлә, район чигн бас цецгәрх. Байн тууҗта Хар Һазра район делгрҗ йовтха! Эндр харһазрахн Хальмгин Баатр Болдра Валерийин һардврт уралан зөрҗ, төрскн һазран делгрүлҗ йовна. Валерий Астаевич нер һарсн күн, чадмг һардач, Адг селәнә делгрлтд ач-тусан күргснднь онц ханлт өргҗәнәв, - гиҗ таңһчин Толһач йөрәлин үгдән темдглв.
Района делгрлтд ач-тусан күргәд, олн җилдән үнн-чик седклтәһәр көдлсн улс байрин хургин йовудт ачлгдв. Тиигәд, таңһчин Толһач Хаска Бату Увшин Анатолийд Хальмг Таңһчин күндтә иргнә, Умадыка Тамарад Хальмг Таңһчин ачта багшин нер зүүлһв, Болдрушкин Виолеттад таңһчин Толһачин Ханлтын бичг бәрүлҗ өгв.
Таңһчин Улсин Хуралын (Парламентин) Ахлач Артем Михайлов, таңһчин залврин Ахлач Босхмҗин Гилән Хар Һазра улсиг ончта өөнлә йөрәһәд, мөрн сарас авн района селән болһнд байрин керг-үүлдврмүд болсиг зааһад, ашлгч хургнь Элстд Манҗин Аркадин нер зүүдг филармоньд бүрдәгдснь хара биш йовдл гиҗ келәд, төрскн һазриннь делгрлтд туслҗадг улсиг ачлв. Хачира Борис болхла района толһач Болдра Валерийлә хамдан таңһчин Улсин Хуралд депутатнр болҗ үүлдсән тодлад, Әрәсән Федерацин Ахлачин Ханлтын бичг бәрүлҗ өгв. Дарунь района билгтнрин концерт болв.
ДООҖАН Наталья

Видео