Бичкдүдин зуни амрлһн сергмҗтә болв

Эндр бичкдүдин амрлһна кем бүрдәлһнә төрт һол оньг өггднә. Зуни цагт эдн лагерьт одад, соньн кесг керг-үүлдврт орлцад, шин медрл хоршаһад, эрүл-мендән, цогц-махмудан батрулна. Зуни сармудт бичкдүдин төлә талдан чигн кесг керг-үүлдвр бүрдәҗ болҗана. Одахн орн-нутгин залврин Ахлачин дарук Дмитрий Чернышенко 2026 җилин зуни цагин эрүл-менд батруллһна кемин аш диглҗ селвлцә давулв. Терүнд министерствсин болн ведомствсин һардачнр, мүҗсин губернатормуд болн эн салврин бүрдәцсин элчнр орлцв.
- Эн җил түрүн болҗ эн төрәр бәәдг ведомствс хоорндк комиссиг регионмудын толһачнр һардв. Лагерьмүдт эмнлһнә дөң күрглһнә шин диг-даран үүлдҗәнә. Хуучта бичкдүд эмнлһнә кергсл олзлҗ чадҗана. Лагерьмүдт учрсн олн зүсн йовдлын тускар дарунь шишлң тойгар зәңглҗ болна. Хамгин сән лагериг йилһҗ авлһна марһан бас бүрдәгднә, зуни цагин кемин ашар нүүрләчнр йилһҗ авгдҗана. Зуни кемд орн-нутгт 40 миңһн лагерь көдлв, 6 сай шаху күүкд-көвүд тенд амрад, эрүл-мендән ясрулв. Тер мет җирһлин күнд таалд туссн 1, 4 сай күүкн-көвүдин төлә зуни амрлһн олзта-туста болв, – гиҗ Дмитрий Чернышенко темдглв.
Хальмг Таңһчд одахн бас ведомствс хоорндк комиссин сүүрт зуни цагин амрлһна ашар күүндвр болв. Насни дигт күрәд уга көвүд-күүкд дунд зака эвдлһнә йовдл уурулхин төлә шишлң керг-үүлдвр күцәлһнд оньган өгхмн гиҗ сүүрт келгдв, талдан чигн сүв-селвг орулгдв. Таңһчин сурһуль-эрдмин болн номин министерств, зөв-йос харлһна болн нань чигн бүрдәцс эн күүндврт бас орлцв.
Хальмг Таңһчд эн зунар сурһульмудын медлд өдрәр үүлддг 88 лагерь көдлв. Тер тоод бичкдүд Яшалтан районд «Лесная сказка», Городовиковск районд «Березка», Целинн районд «Сайгачонок» болн Элст балһснд «Җаңһр» лагерьмүдт зуни сармудт амрв, гиҗ селвлцәнд келгдв.
- «Первые» җисәнә вожатнр болн ах классмудын сурһульчнр, оютнр экологин, иргч эрдм шүүҗ авлһна болн нань чигн халхар онц керг-үүлдвр бүрдәв. Җисәнә көдләчнрин дөңгәр бичкдүд болн арвтнр хамдан кесг нааддт орлцад, хоорндан үүрлдг болв, нег үлү зака эвдхәр седдг арвтнрт тиим дамшлт ик дөңгән күргҗ, теднд сән сурһмҗ өгнә, - гиҗ Цугәрәсән җисәнә таңһчин әңгин хүүвин ахлачин дарук Дорҗин Анатолий келнә.
Ут турштан давсн зунар 7461 сурһульч амрв, тер тоод ЛНР-ин Антрацитовск районас ирсн 100 күүкн-көвүн бас мана таңһчин лагерьмүдт сергмҗтәһәр амрад, цаган соньнар давулв.
ТҮРВӘН Һуна



















Республиканская газета, издающаяся на калмыцком и русском языках. Газета освещает общественно-политические события, происходящие в Калмыкии, а также публикует материалы по культуре и языку калмыков.