Делкә мини гисн седклтә

Эн җил мана орн-нутгт гемтә-шалтгта әмтн дунд «Безграничные возможности» гидг Цугәрәсән марһан түрүн болҗ бүрдәгдв, терүнд орлцх күн эн сарин чилгч күртл эрлһән орулҗ өгх зөвтә. Ода деерән Әрәсән 86 регионас күсдундур миңһн күн терүнд орлцхар шиидәд, марһана мөрә шүүҗ авх санаһан медүлв. Теднә негнь Элстин медәтнрин болн гемтә-шалтгта улсин гер-интернатын психолог Мукөвүнә Ольга болна. Энүг мана таңһчд әмтн сәәнәр меднә, юңгад гихлә Ольга Александровна эрмдгтә улс дунд болдг билг-эрдмин, спортын болн үүдәлтин марһаст даңгин орлцна. Седвәртә, үүрсг, цаһан седклтә, әмтнлә ээлтә күүкд күн оньдин олна нүүрт йовна, талдан улст дөң-тусан күргхәр адһна.
Мукөвүнә Ольга Элстин медәтнрин болн эрмдгтә улсин интернатд нәәмн җилдән көдлҗәнә. Социальн бүрдәцд бәәдг медәтнр энүг эврә үр-саднла әдл тоолҗ, өкәрлҗ Оленька гиҗ дуудна. Зәрмнь ямр нег төрәр сүв-селвг авхар ирнә, наадкснь ю-бис күүндәд, уудьвран һарһхар чигн седнә. Күн болһнд эн килмҗән тусхаһад, бүлән үгән келҗ, оньган өгнә. Дәкәд эн медәтнрлә олн зүсн төрәр кичәлмүд давулна, хамдан үүл бәрҗ кегдлмүд кеҗ һарһна. Цергә шишлң керг-үүлдврт орлцачнриг дөңнәд эдн тосн шам кенә, бичгүд бичнә, дулан өөмс-беелә өлгнә. Медәтнр цергә даалһвран күцәҗәдг дәәчнриг дөңнҗ, буйнч седклин кергт орлцдгнь бас темдгтә.
Мөч тату, эрмдгтә улсин «Шин җирһл» олна ниицәнә үүлдврт Ольга бас шунмһаһар орлцна. Олн зүсн учрар эрмдгтә болсн улс нег-негән дөңнҗ, хамдан марһаст орлцҗ, үүмүлҗәдг төрмүдән хамдан хаһлна. Олна ниицәнә гешүд таңһчин бәәтхә орн-нутгин марһаст орлцҗ нер һарна. Мукөвүнә Ольга ширә деер нааддг теннисәр, дартсар болн армрестлингәр болдг марһаст орлцдг деерән «Невская краса» гидг сәәхләсин марһанд дииләчнрин тоод орсмн. Тер марһанд Ольга Кабардино-Балкаряс Ася Ахриевала, Кировск балһснас Ирина Шалагиновала, Читаһас Светлана Маркидоновала таньлдад, тавн җилдән бат залһлда бәрҗ үүрлҗәнә. Хөөннь эдн Ар Кавказин күүкд улс дунд «Покорители вершин» гидг сәәхләсин марһа бүрдәһәд, Нальчик балһснд терүг давулсмн. Эрмдгтә күүкд улс дунд давулсн марһан эднд омг үүдәҗ, чидл урһасн болҗ медгдв.
Бийнь Ольга Лаганя района Җалһа селәнд өсәд-боссмн. Дунд сурһулян төгсәснә хөөн эн Элстин педколледж орад, эклц классмудын багш болхар зуралҗала. Нег дәкҗ эн хаалһд учрсн зеткртә йовдлла харһад, күндәр шавтв. Хөртә күүкн йовдг арһ уга болад яһҗ икәр зовв гинәт. Зуг эк-эцкиннь, эгчнриннь болн олн элгн-саднаннь нилчәр эн бийән бәрәд, чидл урһасн болв. Хамдан сурсн үүрмүднь болн багшнрнь бас ик урмд өгв гиҗ Ольга келнә. Олна дөңгәр эн сурһулян төгсәһәд, хату цаас авв. Хөөннь эн психологин эрдмтә болв, ода экономикин халхар ик сурһульд сурчана. Эн тааста эрдмәрн ода көдлҗ, үүрмүдтәһән хамдан зуульчлна, сенр хот-хол болһад, гиичнрән гертән тосч авна. Талдан улст мел сана зовдг төләдән эн мөч тату улсин терг ясдг туслмҗ күрглһнә халхар төсв күцәхәр зуралҗана. Делкә мини гисн седклтә күүкд күүнә санан эрк биш күцх гиҗ сангдна.
- Өөрхн улс, багшнр болн үр-иньгүд нанд дөң болснд би ик ханлтта бәәнәв. Мөч тату болсн бийнь би сурһулян сурад көдлҗәнәв, олна ниицәнә үүлдврт орлцнав. Талдан улст бас дөңгән күргхәр шуннав. Нег дәкҗ Элстин паркд өкәр күүкн нан тал өөрдәд мендләд, - та намаг таньҗахшвт, - гиҗ сурв. Тиигн гихнь, эн нег һазра күүкн бәәҗ. Бичкнәсн авн эн эрмдгтә бәәәсмн. Шалтгта болҗахнь ик зовлңта бәәсмн, зуг танас үлгүр авад, талдан улсла әдлв гиҗ тоолдг болув, - гиҗ тер келснь седклим байрлулв, - гиҗ Ольга келнә.
Деер келгдсн марһан гемтә-шалтгта улст эврәннь күцәмҗин тускар олнд медүлҗ, талдан улст үлгүр болх арһ өгчәнә. Марһана дииләчнр 12 әңгәр йилһгдхмн. Жюрин гешүд дунд Татьяна Голикова, Сергей Безруков, Диана Гурцкая, Роман Костомаров болн нань чигн нертә улс бәәнә. Бидн Мукөвүнә Ольгад марһанд диилвр бәртхә, гиҗ дурдҗанавидн.
ДООҖАН Наталья



















Республиканская газета, издающаяся на калмыцком и русском языках. Газета освещает общественно-политические события, происходящие в Калмыкии, а также публикует материалы по культуре и языку калмыков.