Ясрулх єазриг імтн шўўљ авх

26-02-2019, 16:52 | ---

2017 љиліс авн мана орн-нутгт, тер дотр тањєчд, «Балєснд сін кец-таалта біідл тогталєн» гидг эркн чинрті тґсв эклід кўцігдљіні. Єурвн љил дарандан Элст балєсн эн тґсвд орлцљана. Келхд, 2018 љилд хотл балєснд Диилврин паркин болн «Иньгллт» паркин єазриг ясрулсмн. Ниднієі тґсвин йовудт «Дружба» паркин эргндк біідлиг ясруллєна 2-ч девсњгин кґдлмш кўцігдв. Энд бичкдўдин талвњ, хаалєин љисі даслєна тґлі бичкдўдин автогородок тосхгдв. Бииєин тіізин кец-таалынь ясв. Імтн амрдг ормс бўрдісмн, тротуармуд ясљ шинрўлсмн, нань чигн зўсн-зўўл ясруллєна кґдлмш кегдсн болдг. Тер мет балєсна 7-ч микрорайонд біідг Диилврин паркд бичкдўдин талвњ тосхгдв. Энд кўўкд наадхин тґлі дўўљњгўд, дееріс дорагшан бууљ дошдг ґґдмс, нань чигн нааддг тоот тівгдсмн. Талвњгин эргндк єазриг ясрулад резинов плиткс делгв, тротуар тосхв, герл ґгдг сііхн панрмудар, шин скамейксар, хог-богин урнсар тетксн болдг. 2019 љилд Диилврин паркин кец-таалынь ясруллєна 2-ч девсњгин кґдлмш кўцігдх.
«Балєснд сін кец-таалта біідл тогталєн» гидг тґсв ил кевір болн олн імтиг орлцулљ кўцігдљіні, энтн тґсвин єоллгч ончнь болљана. Імтн бііх єазран ясруллєна тґсв шўўљ авлєнд, терўг біідл-љирєлд тохралєнд болн олна бўртклєнд орлцљ чадљана. Элстин администрацин балєсна эдл-ахун болн административн-техническ бўртклєні заллтын эргндк єазриг ясруллєна іњгин єардач Елена Урванцеван келсір, тўрўлід хотл балєснд олн улс хурљ амрдг 20 єазрас 3 орм шўўљ авсмн. Імтн хамгин икір правительствин Герин ґґрк аллейин, амрлєна болн сойлын «Иньгллт» паркд бііх Диилврин талвњгин болн Аршан селінд бііх скверин эргндкиг ясруллєна тґлі дууєан ґгсмн. «Балєснд сін кец-таалта біідл тогталєн» гидг тґсв кўцілєні тґрір ўўлддг Элст балєсна олна комиссин шиидврір февраль сарин 28-д эн єурвн ормас негинь шўўљ авх. Элстин 18 школд болн бичкдўдин ўўділтин Біішњд дууєан ґглєні пунктс бўрдігдв. Тегід 14 нас кўрсн уйн наста кўўкд-кґвўд болн бґдўн улс иткл цаасан авч, тиигірін ирљ, 2019 љилд ямаран єазрин біідлиг ясрулхин тґлі дууєан ґгч чадхмн. Тиигід ясрулх амрлєна єазриг імтн шўўљ авх.

Маргарита АРЗАЕВА

Видео